ئولسون باجون گورّم گوزون گریاندی قارداش
اوغلانلاریم جانیم سنه قرباندی قارداش
سن آغلاسون قان آغلارام
قلب جهانی داغلارام
صبر ایله قارداش (2)
دُرّ سرشگون ایلمه رخساره ارزان
اولسون ئوزوم اوغلانلاریم ای جان جانان
بیر تار موی اکبره مین دفعه قربان
بو سوز منه عشقیم ویرن فرماندی قارداش
حفظ ایت وقارون آغلاما ای شاه خوبان
دشمن قباقینده دایان شاداب و خندان
زینب باجون اولسون سنه هر لحظه قربان
عشقونده جان قربان ایدم ارزاندی قارداش
سن راحت اول‌زینب سایار بو دردی ساده
شرمندیم فِدیم حسین یوخ فوق‌العاده
حاشا سالام اولادیمی بیر یولدا یاده
هر تک تکی قربانی قرآندی قارداش
درس عَمَل من آغلیان نسوانه ویرّم
گر ممکن اولسا جانیمی جانانه ویرّم
مین اوغلومی قربان رَه قرآنه ویرّم
دینون بقاسی دهریده چون قاندی قارداش
غیرت خروش و جوش ایدور زینب قانیندا
ایمان قانیلان سیر ایدور یورقون جانیندا
اولاد آدین من دوتمارام لیلا یانیندا
اکبر کیمی اوغلی ئولوب نالاندی قارداش
عالَم بیلور اکبر نجه نازلی بالیدی
هر بیر نگاهی قلبیدن طاقت آلیدی
ای کاش ئولیدی زینبون اکبر قالیدی
لیلا سینه دنیا یوزی زنداندی قارداش
دنیا و مافیها هامی قرآنه قربان
اوغلانلاریم جانیم ئوزوم جانانه قربان
قربانلاریم سن ویردیگون قربانه قربان
اظهاریمه خندان یوزوم برهاندی قارداش
من بیر الی بوش بندَیم گُللر سنوندی
اکبر حضورینده گوزل اکبر سنوندی
من بسلین گللر حسین یکسر سنوندی
صر صر ویروب گلزاروی تالاندی قارداش
- جمعه
- 15
- اسفند
- 1399
- ساعت
- 21:29
- نوشته شده توسط
- یوسف اکبری
- شاعر:
-
حاج غلامرضا هادی اردبیلی
ارسال دیدگاه