اوچگوندی بو گون فاطمه مشغول عزادی
گه ذکری حسن گاه بابا گاه رضادی
بوگون ختم عزادی .....
اوچگوندی بو گون آغلوری گوگلرده ملک لر
چون ترک ایلیوب عالم ناسوتی پیمبر
عرشنده قوروب بزم عزا خالق اکبر
پیغمبره عرشی یارادان صاحب عزادی
بوگون ختم عزادی ....
اوچگوندی بو گون فاطمه سرگشته و گریان
گه قبر پیمبرده ایدر ناله و افغان
گه قبر پیمبردن ایدر عزم خراسان
گه قبر حسن اوسته سوزی وا ولدادی
بوگون ختم عزادی ....
پیغمبری خیبرده یهودیه بیر عورت
مسموم ایلیوب قلبنه زهر ایتدی سرایت
دنیادن او زهریله گیدوب ختم رسالت
زهرانون او ساعتدن ایشی وا اَبَتادی
بوگون ختم عزادی ....
قیزلار آتا هجرانینه تاب ایلیه بُلمز
هر قیز آتاسیز قالسا جهاندا یوزی گُلمز
خاصّه بیر آتا عالمه مثلی داخی گَلمز
قان آغلاسا زهرا بو مصیبتده بجادی
بوگون ختم عزادی ....
اَل چکمدی بو چرخ دنی اهل وفادن
سعی ایتدی سالا گلشن زهرانی صفادن
آخرده امام حسنی زهر جفادن
مسموم ایلیوب باخمادی محبوب خدادی
بوگون ختم عزادی ....
اولماز نجه معناده خانم فاطمه محزون
غربتده گوروب اوغلی رضانی او جگر خون
مسموم ایلیوب ظلمیله دین دشمنی مأمون
غربتده غریب اولدی غریب الغربادی
بوگون ختم عزادی ....
هر بُقعه ده مدفون اولوب اولاد پیمبر
ماتم دوتار اول بُقعه ده زهرای مطّهر
الیته اولور شایق اوغول قبرینه مادر
امّا خانما عمده نظر کرب و بلادی
بوگون ختم عزادی ....
آغوشه چکر مرقد پر نور حسینی
عرشه اوجالار وا وَلَدا شیون و شینی
آغلار یانار اوخشار او قطیع الودجینی
ثکلالره قان آغلاماق البتّه سزادی
بوگون ختم عزادی ....
بر حالده کیم اشگی تفوّق ایدر ابره
گوز یاشلی خطاب ایلر او شش گوشه لی قبره
اولدون متحمّل سن اگر چه هامی جبره
امّا آناوُن حشره کیمی شغلی نوادی
بوگون ختم عزادی ....
چوخ اوغلی اُلنلر مِیِ ناب غم ایچوبلر
زهرانی ولی اوغلی اُلنلرده سیچوبلر
اوغلندان اوغول چوخ آنالار گر چه گیچوبلر
زهرا کیمی قدّی بوکولن هانسی آنادی؟
بوگون ختم عزادی ....
چوخلار چالیشوب نام حسینی ایده مفقود
باخگور نجه مفقود ایدن اولدی اوزی نابود
«صابر» سوُوسن گر اولاسان حشرده مسعود
ذکر ایله حسین آدینی هر درده دوادی
بوگون ختم عزادی ....
- چهارشنبه
- 20
- اسفند
- 1399
- ساعت
- 21:59
- نوشته شده توسط
- یوسف اکبری
- شاعر:
-
مرحوم صابر تبریزی
ارسال دیدگاه