آتدان دوشنده توپراقا سردار نامدار
سسلندی دادیمه یتیش ای میر تاجدار
سال سایه وی بو مهلکه ده باشیمه منیم
ای فاطمه عزیزی امام بزرگوار
گوز تیکمیشم گلن یولوا مین امیدیله
اطرافیمی احاطه ایدوب فرقه شرار
اَللی لرین الینده بو السیز بدن قالوب
باشیم دوشوب قضایه غمه اولموشام دچار
قربان اولوم گلن یولوا هاردا قالموسان
قویما منی بو سون نفسیمده چوخ انتظار
قربانیوی یخوبلا مناده اوزون یتور
جان ویرمرم گلونجه سن ای نازنین نگار
مرغ دلیم وصالیوه چوخ بی قراریدور
لطف ایت مریض عشقیوه باش چک طبیب وار
بیر اوخ دگوبدی مشکیمه قان آغلادور منی
سقایه یوز ویروبدی بلایای جان شکار
ای وای منه که چخدی بو چولده الیم بوشا
مندن سوسوز بالالاروون انتظاری وار
ای کاش آشا بو نهر فراتین سووی داشا
بوردان جنازه می آپارا ایليه کنار
من نهرین اوسته حشره جه راحت یاتانمارام
آخدوقجا سو ، گلر سَسی بو قلبیمی سِیخار
زهرا آنان کیمی نولی گیزلین مزاراولام
بوردا رباب دردی یا دیمدان مگر چیخار؟
آلسان اگر بو دم سسیمی سس یتور منه
ای امت پیمبر اسلامه غمگسار
تعجیل ایله قدملریوه من فدا اولوم
السیز بو پیکری اوزون اللردن آل قوتار
گلسن گوزومده باخما گیلن اوخ یاراسنا
قلب شریفیوی ایليیر چون جریحه دار
دوشسه گوزون و یا که قلم قولارا اخا
توکمه عذاره گوز یاشی چون شبنم بهار
ایندی منیم الیمده دگور اللریم ، دورام
گوز یاشیوی اوزوم سیلم ای میر تاجدار
یوخ سوز چتیندی قارداشا قارداش مصیبتی
سّری ندور که قارداشی قارداش غمی یخار
گلسن دیمه غمونده بلیم سندی آچ گوزون
باخسام خمیده قامته آرتوق توان آلار
لطف ایلسن اگر دیَرم عرض حالیمی
من دل شکسته نین سنه بیر عرض حالی وار
عبداللّهین خیالین او که باشدان آتموشام
یوخ یا سوزوم مدینه ده قالدی آنام فکار
ایندی سنون بالا لاریوون ناگرانیم
غارت خیالینه دوشوب اشرار کین شعار
مقدور اگر چه اولسا قبول ایت بو خواهشی
گلمه و یا که گورسن حرم ناگران اولار
اخیامیده بویور سن اوزون عرض حالیمی
ائیله منیم دلیمجه حرملردن اعتذار
تاپشور امام ساجده دفن ایلسه منی
باش داشیمی یازاندا عنایت ایدر یازار
بوردا یاتان او قافله سالار عشقیدی
مقصودینه چاتانمادی اولدی شکسته بار
ساده ثواب نوحه نه تنها سنونکیدور
اولدی شریک اجر سنه عندلیب زار
- پنج شنبه
- 21
- اسفند
- 1399
- ساعت
- 23:20
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه