جنگوزه گلدی قوشون بو یادگار مجتبا
قاسمم دینین یولوندا ایلرم جانی فدا
قاسم رزم آورم/جان فدای اکبرم
ای جفا جولر گلون رسم وفادن
چخمیون
قلب عالمدورحسین،قلب شریفین سیخمیون
خانه ی دینی گلون دیناره خاطر
یخمیون
حشریدن قورخون قاباقدا واردی بیر یوم
جزا
ظلموله توپراقه سالدیز سیز عم اغلوم اکبری
نوجوانم گرچه من ای شام و کوفه
لشگری
انتقام آللام بوگون سیندیرّام ایندی صفلری
ضرب شستی ایلرم میدان ایچینده برملا
من یتیم مجتبایم دینه سربازم بولون
نغمه ی اسلامیله چوخداندی دمسازم بولون
مکتب اکبرده من شاگرد ممتازم بولون
یر گویی دوتسا قوشون خوف ایتمرم من مطلقا
عرصه ی جولانگَههَ من گلمدیم اوز باشیمه
بو شهادت شهدیدن شیریندی آل هاشیمه
گر مصادف اولسا جسموز تیغ آذر پاشیمه
الحذر صوتی چخار افلاکه ای قوم دغا
من گرکدور دین یولوندا باش و جانیمدن گیچم
زشتی زیبادن بوگون نوری قرانلیقدان سیچم
اکبرِ شهزاده تک شهد شهادتدن ایچم
قویمیَم عصرین امامی عرصه ده یالقیز قالا
بو حسین بن علی راه خطا گیتمز قوشون
آل هاشم شأنینه بیر کیمسنه یتمز قوشون
حیدرین اولادی دشمندن هراس ایتمز قوشون
منده حیدر قانی وار باش اگمرم شیطانلارا
چکدی شمشیرین اودم اولدی سپاهه حمله ور
مرتضی تک لشگری یاردی سالوب کونه شرر
یا علی سسلردی دیلدن،هریره ایتدی گذر
فکر ایدوبلر کربلایه یوز قویوب شاه ولا
گوئیا نو کدخدادی یوز قویوب دلدارینه
قوّت دیل ویردی خالق بیرده قلب زارینه
بیر قلج ووردی ازلده لشگرین سردارینه
عرشین اهلی سسلدی صدمرحبا صدمرحبا
آز زمان گیچدی قالوب (بیکَس)او چولده دلغمین
توپراقا دوشدی اوجالدیب ناله سین زارو حزین
ای قلم یازما نه ایتدی نَعل لر گُل پیکرین
سسلدی گل دادیمه ای معدن جود و سخا
- جمعه
- 22
- اسفند
- 1399
- ساعت
- 16:31
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه