عجب کرم قیلوب بابا بو کاروانی ساخلادون
یارالی باشیله نجه بو ساربانی ساخلادون
قیزون فدا اولا سنون گوزونده اشک آلوه
خدایه شکر اولا گینه یتشمیشم وصالوه
خدا بولور بو چولده من اَسفلی حاله قالمیشام
قاچاندا داشلار اوسته من ئولومی یاده سالمیشام
ایاقیمه تیکان باتوب غم اوستونه غم آلمیشام
بو خیردا جا قیزین ایله باتوبدی قورخودان سسی
سفارش ایله عمه مه منِ غریب و بیکسی
ندن بو آیدا چخمادی بیر آز ایشیقدا آغلیم
ایاقیمون تیکانلارین چکوب جهانی داغلیم
نه وقتیمیدی آی بابا اوزوم یارامی باغلیم
باتاندا خارلر دیمم حصار صبری یخمادی
یر ایلیوبدی بعضی سی ایاقدا قالدی چخمادی
شکایت ایلرم بابا خدای حیّ و داوره
مصادف اولموشام ندن گروه کافره
بیری قوور بیری سویور بیری دوتور وورور یره
خدا بولور کی قوم دون نقدری دویدولر منی
بو قدر غصه و جفا یقیندی ئولدورر منی
بو چولده زجر دون منی زبس قوووب اویان بویان
حیاتیدن اوسانمیشام ئولومدی آرزوم اینان
اوقدر سیلی لر ووروب گوزومده تار اولوب جهان
وورانمورام یوزومه ال دگنده اینجیری بابا
دوشوب محاقه صورتیم آناوا بنذیری بابا
گلایه ایتمرم بابا اوزون قضاوت ایت ولی
یانار ایشیتسه غصه می نجفده مرتضی علی
نه نسبتی کیچیک یوزون بوزجر کافرین الی
گوروم شل اولسون ای بابا بو زجر شوم و کافری
اَلو چکور یوزوم بابا زبس آغیردی اللری
فلک سالوب بلالره بو بینوا یتیمه نی
اسیر ایدوبدی دشمنه سالوبدی وحشته منی
دوشوبدی قورخی جانیمه هرایه سسلدیم سنی
زبس بو چولده قاچمیشام صاقا صولا منِ غریب
یانیبدی قلب فاطمه هرایمه آنان گلیب
اگر چه (بیکَسا) سنون یوخوندی قدرت بیان
کرم له لطف ایدوب سنه امیر ملک انس و جان
اجازه ویردی یازمیسان بو نچّه خطی بس دایان
بورسمدور غلاملر سوزون دیوب دورار گیدر
غلام دردینه ولی امیرلر دوا ایدر
- شنبه
- ۲۳
- اسفند
- ۱۳۹۹
- ساعت
- ۱۹:۱۰
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه