عنایت ایتسه منه کردگارِ بی هَمتا
یازام امام حسن محنتین، به شرطِ بَقا
زَکیّ و صامِت و هم عسکری مُلَقَّب دور
اولوبدی حُجَّتِ هادی عَشَر، امامِ هُدا
مدینه ده گوز آچوب شهریارِ کوْن و مکان
وَلیک مدفنی سامرّه ده، دوشوبدی جدا
آتاسی حضرت هادی تک اولدی تَحتِ نَظر
تمام عُمری گوروب محنت و بلا و جفا
یازیلّا عُمری اونون ایرمی سَگّیز ایل اولدی
او آز زماندا چکوب اِبتلا و درد و بَلا
گیچوبدی عُمر شریفی درونِ لَشگرگاه
اوزاق دوشوبدی وطندن امامِ اَرض و سَما
نچه خلیفه ی عبّاسیه دچار اولدی
تمامی اهل جَفا، قان توکن، شَریر و دَغا
ولیک مُعتَمدین ظلمی چوخ اَشَدّ اولدی
سالوب ایاقدان ایدوب راهی دیار بَقا
امامین عادتی احسان و لطفیدی دائم
اگرچه اینجیدی دشمن الینده صبح و مَسا
ولایت اهلینه هردم ایدردی لطف و کَرَم
ایدردی دردِ مُحبّینه لطف اوزیله دوا
یازیبلا شهریده بیر سارقی دوتوب گَتدی(1)
حضورِ حضرته شهر اهلی، دیلده نوا
دییَردیلر بو کیشی سرقَت ایلییوب امّا
دیور کی شیعییَم ای بهترینِ خلقِ خدا
بویوردی حضرت او جَمعه یالان دیور بو کیشی
کی شیعه لیق اَثری یوخدی چهره سینده بِجا
گَرَکدی شیعه بیزیم خَطّیمیزده سِیر ایله سون
وَگَرنه شیعه دگول، گَر دیسه، دییوبدی خَطا
آپاردیلار وورالار سارقِ نِگون بَختی
وَلیک بیر ایش اولوب، حیرَته دوشوب اعضا
نَقَدری ایسته دیلر تازیانه وورسونلار
خطایه گیتدی بیری دَگمییوبدی هرگز اونا
آپاردیلار گینه ده محضرِ امامه اونی
تَعَجّبیله دییوب ماجرانی اهلِ ولا
بویوردی شیعه دَگول گرچه اشتباه ایلیوب
مُحبّ ِ آل پیَمبَردی قلبیدن امّا
بو رَمزیله یتیروب اوز گووجی دگول بلکه
اونا ائمیه خاطر بو لطفی ایتدی خدا
ولایت اَهلی جهاندا، هارا یتیشسه اَگر
ائمه لُطفودی بولسون، بدونِ چون و چرا
کناره چخما قَلَم، عسکری شهادتیدی
دونوبدی قانه اورَک، ایله سنده آه و نوا
ویروبله زهر جفا، یاندی قلبِ رَنجوری
اَلی اورکده دیلینده واریدی بیله ندا
دییَردی گَل آنا یا فاطمه ئولور اوغلون
بالام یتیم اولوری گَل هرایه یا زهرا(س)
او لحظه ده باشی اوسته گَلوب امام زمان(عج)
ووراردی باشه ایدردی فغان و داد و بُکا
ویرنده جان حسنِ عسکری گلوب اوغلی
توکردی گوز یاشینی سسلییَردی وای، بابا
نه یاخشی قاعده دی جان ویرنده هر انسان
بالاسی لحظه ی آخر باشین دیز اوسته آلا
نَدَن بو قاعده بَس کربلاده اولدی عوَض
اوغول جنازه سی اوسته گَلَنده شاهِ ولا
چَتیندی داغِ جوان، اولسا گوز قاباقینده
خصوص اَکبر اولا، اول جوانِ ماه لقا
نچه قدم دیزی اوسته سوروندی شاهِ شهید
اوغول جنازه سینه تا اوزون یتیردی آتا
یتیشدی گوردی علی جان ویریر قوم اوستونده
آچور یغور اَیاقین، آز قالور کی روحی اوچا
نجه جنازه پوزوب نقشه سین جفا اهلی
نجه جنازه قلج، نیزه، اوخدی سر تا پا
اَگیلدی قویدی یوزون اَکبرین اودم یوزونه
کی بلکه داغلی اورک، نچّه لحظه ساکت اولا
محاسینین بویادی قانیله شهِ عطشان
اوجا سَسیله دییَردی، امام، وا وَلَدا
بویوردی غمدن اوغول راحت اولموسان امّا
آتاوی دشمن آرا قویموسان تک و تنها
سَریبله جسمیوی توپراقلارا جفائیله
دولوبدی جسمیوین عطریله بو دیار بَلا
زِبَسکی پیکریوی دوغرییوب بو قوم پلید
گرک آچام سنی حمل ایتماقا، یر اوسته عبا
عبایه ده یغا بولسَم بو جسمِ صد چاکی
خیامه حملی چتیندی، گَرک گله سَقّا
دورانموسان ایاقا باری گوزلرون آچ اوغول
چتیندی سن بولوسن کی شمادتِ اعدا
زیارت عشقینه یازدی بو مطلبی (بیکَس)
یازار براتینی حتماً، شبیهِ حضرت طاها
- شنبه
- 23
- اسفند
- 1399
- ساعت
- 22:50
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه