غمونده زینبی دوران عجب بلایه سالوب
صغیره سنیله دشمن آنامی الدن آلوب
منیم نه وقتیمیدی سرپرست اولام ائویوه
بلایه دوزماقا قویدی خدا سنون یریوه
آتان بهشته گیدندن دونرگه میز دوندی
هزار حیف رسالت چراغی تز سوندی
قاپون یاناندان آنا حیف اولا مریض اولدون
خزان گورن گوله بنزر سارالدون هی سولدون
ایوینده قویمادیلار ناله و بُکا ایده سن
جماعت اولدولا باعث چخوب چوله گیده سن
بابام او چولده سنه قوردی بیر عزاخانه
عدو او منزلی ده ایلیوبدی ویرانه
پناه آپاردون آنا چولده نخل سایه سینه
وئروب حسین و حسن سس آناسینون سسینه
جوار نخلیده آغلار نچون سحاب اولدوز
کسوبدی نخلیده دشمن یانوب کباب اولدوز
ز بس جهانی سنه تنگ دوتدی دشمن دون
ایدوبدی غصه گلو گیر دردیوی دیمه دون
اجازه آلدون آتامدان گیدنده مسجده سن
ثبات حقه گوره همره اولدی اوغلون حسن
او تیغ منطقیله آلدون حقیوی افسوس
مصادف اولدی سیزه( قمطریر اولان بیر عَبوس)(سوره انسان۱۰)(بد اخلاق و وحشتناک)
گونون گونورتا چاقی یول کسن یولون کسدی
ئولونجه آغلاماقا زینبه بو غم بسدی
او کوچه ده نلر اولدی خدا بولور آناجان
حسن ده سن کیمی سولدی خدا بولور آناجان
او کوچه ده نلر اولدی اورک قانین اوتدون
ایله او گوندن آنا سن آتامدان اوز توتدون
اوزون کی دردیوی گیزلتدون ای آنا مندن
حسن ده باری دانیشمور بیر آز دیه سندن
غمون گچوبدی عدد دن اورک سیخیلدی آنا
دعالرون عوض اولدی ایویم ییخیلدی آنا
بهار عمروده آخر یوزون سولوب آناجان
بیر اللّی ذکر قنوتون قبول اولوب آناجان
مباشر اولدی سنون غسلووا آتام حیدر
ولی نه غسل، دیسم عالمی کباب ایلر
دوشنده آی ایشیقی خسته جسمیوه ناگاه
رموز جور و جفادن آتام اولوب آگاه
مصیبتوندن آنا نصف شب الولاندی
دایاندی نچه دقیقه هرای چکوب یاندی
امان او وقتیدن اما ائلوندن آیریلدون
قویوب آنا بیزی آغلار ایویندن آیریلدون
گیدنده تخته ی تابوت، سخت ساعت اولوب
گیدوب گلینجه آتام ائوده بیر قیامت اولوب
سنون فراقیویله روح و جانی داغلاردوخ
آتام گلونجه ولی چوخ یاواشدان آغلاردوخ
گلنده ییغدی بیزی باشینه ولیّ خدا
دونوب بویوردی منه زینب اوخشا بیر آناوا
یتیمه آهی ائدر قلب عالمه تأثیر
سن اولماسان آنا زینب بو عالمی نینیر
خدا بولور سحر اولدی همان گئجه نه چتین
زمان صبحیده ثانی گوتوردی کفر علمین
نهان اولا آنا قبرون بو سری بولمزدیم
اگر آچیدی عدو قبریوی دوزنمزدیم
خدایه شکر اولا واردور هله آتام حیدر
وگرنه اهل مدینه خدا بولور نیلر
ولی او گوندن آنا، مرتضاده چوخ قوجالوب
سنون فراقون اونی درد بی کرانه سالوب
گونوزلر ایوده آتام دیزلرون قوجاخلور آنا
گمان گلور گئجه وقتی بقیعده آغلور آنا
بو سوزلری آنا (بیکَس) یازاندا دیده سی گریان
مدینه حسرتی غملی دیلینده ایلیَیر افغان
- دوشنبه
- 25
- اسفند
- 1399
- ساعت
- 12:51
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه