اَماندی گوزله بَشَر، عُمرووی سن ایتمه خراب
یخینلشور اَجَلون اِیْله فکرِ روزِ حساب
گلور قاباقدا او گونکی، چَکَلله مَحکَمیه
گَرَک جواب ویره، کردگاره، شِیخیله شاب
خدای عالَمیان اَمریدور، یالان اولماز
کی ذرّه لر ساییلار، موقعِ حساب و کتاب
تمام عُمرِ بَشَر،انتخابه باغلیدی بَس
کی حق یولون گیده یا باطلی، اَیا اَحباب
هر انتخابه ولی اَلده اولماسا بُرهان
او انتخاب اولاجاق، مایه ی بَلا و عذاب
اگر سَنون باخیشون عالَمه دقیق اولسا
دوز انتخاب ایلیوب، اولماسان داخی بیتاب
او کَسکی رأیی نی ساتدی ناهاره یا شامه
یقین خیانت ایدوب مسلمینه یوخدی جواب
هَرَه عمل لرینه، عاقبت ویرر پاسخ
نه چون مساوی دگول دهریده شَرابیله آب
غلط آداملارا سن اولما نَردُبان ای دوست
اولار دییَن سو دگول، تَشنیه ویره لّه سَراب
وَلیک یاخجی لارا ایتمه سن حمایت اگر
زُبیر تک اولاجاقسان جهاندا خانه خراب
اَزَلده تیغ چکوب شاهِ اولیایه زُبیر
گوروب برابر اولانماز یقین، عُقابه، ذُباب (مَگس)
نه جَنگ ایدوب نه ده یار اولدی حیدره گیتدی
دیدی کی بیطرف اوللام، اوزون ایدوبدی مُجاب
وَلیک بولمه دی حقّه او کَسکی یار اولماز
جهنّم اهلی اولارعاقبت بویوندا طناب
فدا اولوم آدینا حُرّه باخ، یولون تاپدی
بولوبدی حَقّی، آتوب کُفری، فوری ایتدی شتاب
سالوب اَشاقه باشین عرض ایدوب امامه بویور
گوروم کی توبیه یول وار، و یا کی واردی عِقاب
بویوردی باشیوی قووزا، بیزه قوناقسان سن
اَماندی عارضیوه، اَشکی توکمه مِثلِ گُلاب
جهاندا کیم باش ا‌َگَه، اَهلِ بیتِ اَطهاره
یقیندی گورمیه جاق حَشریده اوکیمسه عذاب
ویروبله دینه فدا، چوخ آنا، بالالارینی
وَلیک آز آنا وار، معرفتده مِثلِ رُباب
عروسِ فاطمه نی حَرمله سالیب دَرده
بیر اوچ پَر اوخ،خانیمین روزگارین ایتدی خَراب
او اوخ کی ووردی عَلمداره مثلینی ووردی
او صود اَمَر بالیه، حَرمله ایدوب بی تاب
نَلَر اولوب دیمَرَم، اوخ دَیَنده دیسگیندی
دوباره اَللری اوسته امامین ایلدی خواب
گَلَنده نعشی خیامه قیامت اولموشدی
بویوردی زینبه گَل آل، بالام اولوب سیراب
آناسینا خَبر اِیْله، دا آغلامور یاتدی
قوتاردی گوللرینی، باغبانِ آلِ تُراب
ربابه باخ بالاسین گوردی عرض ایدوب شاها
بالام فدا سنه ای یادگارِ خَتمِ مَأب
کیچیکده اولسا هَدیه م بویوک حساب اِیْله
فدا اولوم سنه قَلبون، بو نوعی ایتمه مُذاب
مین اوغلوم اولسا فدا دینه، راضییَم سوز یوخ
مَباد، غُصّه لی گورسون، سنی بو لشگر اَعراب
ویریبدی درسِ وفا، عالَمه رباب خانیم
وَلیک اوخشاماسی عالَمی ایدردی کَباب
دییَردی بَختیمون ای اولدوزی نه تز باتدون
سنی گورونجه بوحالیله کاش ئولیدی رُباب
بو (بیکَسین) بولوسن سن اُمیدی سن اوغلوم
گوزون تیکوب اَلیوه دوت اَلین به روزِ حساب
- چهارشنبه
- 27
- اسفند
- 1399
- ساعت
- 23:9
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه