بارالها بونه دوراندی که وجدان ساتیلور
کهنه بازاریده مین یوسف کنعان ساتیلور
تیره دنیاده دوشوب خیرالعمل قیمتدن
عجبا جامعه ده دینیله ایمان ساتیلور
دست ظلامیله مکتب قویولوب حراجه
دین و تقوا وشرف گورنجه ارزان ساتیلور
فاسقی دارآغاجیندان قوتارورقاضی شهر
قاضی ومحکمه و کیفرومیزان ساتیلور
پیرحق بین ادب، جبرا"اولوب خانه نشین
جاهلین سوزلری چون لوءلوءومرجان ساتیلور
بعضی عالمده ساتورآخرتین دنیایه
باشداعمامه سی چون تاج زرافشان ساتیلور
متشاعر چوخالوب، شاعر اولوب خانه نشین
غلط اشعار اولوب دفترودیوان ساتیلور
نوحه خوان نوحه دیور ساعتی بیرمیلیون آلیر
ایتمه ایراددیسم شاه شهیدان ساتیلور
درس قرآن ویریلور امته دیناره گوره
نیزه اوستونده کاءنه گینه قرآن ساتیلور
هریریندن دوران استاد اولوب مکتب آچوب
گورنه بیجایره القابیله عنوان ساتیلور
تخت زرده اوتوروب مور ایدور سلطانی
چرخده گردشه بیرباخ که سلیمان ساتیلور
توکولورحق دینون قانی بووانفساده
گینه بازاریده اوچ شعبه لی پیکان ساتیلور
چوخلی قانلارتوکولوب دین وشریعت اوسته
حیف اولا دست جفاییله کماکان ساتیلور
آفت سستی پیمان بوریوب جامعه نی
هیچه خاطر نیجه گور عهدیله پیمان ساتیلور
بیریده رنگ الیور سرچه نی بلبل یرینه
خلقه تبلیغ الیور مرغ غزلخوان ساتیلور
فقرفرهنگی ایدور امتی مین درده دچار
غرب فرهنگی اولوب ملته برهان ساتیلور
بعضی نسوان الیور جامعه ده کشف حجاب
بیردین یوخدی که حیثیت ایران ساتیلور
شیعه ناموسی دی مین رنگیله آرایش ایدور
گوهر عفتی چون قالی کاشان ساتیلور
قیزیشوب غیبت و بهتان وریابازاری
اولونور بیع وشری، مین رقم عصیان ساتیلور
صاف ایله قلبووی "ناعم"بوفنادنیاده
حشریده صاف اوره گه ، روضه ی رضوان ساتیلور
- جمعه
- 29
- اسفند
- 1399
- ساعت
- 11:57
- نوشته شده توسط
- یوسف اکبری
- شاعر:
-
محمدرضا محمدی (ناعم)
ارسال دیدگاه