دوباره بیت ولاده نه شور و غوغادی
ملائکه گلوری دیلده نغمه ی شادی
زمانِ لطف و عطایِ خدای یکتادی
ویریبدی بیر قیز حسینه عجب دل آرادی
دولاندی گون گینه گَلدی زمانِ میلادی
آدی رقیّه دی امّا شبیه زهرادی
آلوب قوجاقینه مولا او تازه مولودی
اَزل اَدا ایلدی شکر حَیّ معبودی
اذان قولاقینه ویردی به صوتِ داوودی
آنام بتول کیمی سویلدی نه خوشبودی
عجب گوزل یارادیب ذاتِ حق نه زیبادی
آدی رقیّه دی امّا شبیه زهرادی
ویرردی الدن اَله آلِ احمد(ص) مختار
دیردیلر نه گوزل خلق اولوب گُلِ بی خار
آلوب قوجاقه اودم دختِ حیدر کرار
بویوردی عمّه سی قربان قریبه گوزلری وار
گوزونده فاطمه تک نور حق هویدادی
آدی رقیّه دی امّا شبیه زهرادی
عجب عنایت ایدوب خالق زمین و زمان
ایدوبدی قدرتینی اهل عالمه اعلان
دوباره خانِ عطایه ایدوب بیزی مهمان
ویروبدی قارداشیما بو گولی حقِ منّان
بو غنچه گولدی بونون باغبانی مولادی
آدی رقیّه دی امّا شبیه زهرادی
آچیبدی بابِ کَرَم یر گویی گوزل یارادان
شبیهِ دُخت نَبی ایلیوب بیزه احسان
بونون جمالینه هر کیم باخیر قالور حیران
صفای منزل اولار یا حسین رقیّه بالان
نشانِ مَرحَمتِ کردگارِ یکتادی
آدی رقیّه دی امّا شبیه زهرادی
دییدی زینبه ایکاش ،پادشاه ولا
کی واردی بو قیزیما چوخ مصیبتیله بلا
امان اوگون گیده سیز سوی خاکِ کرب و بلا
دییدی کاش باجی قویما بو قیزی وورالا
ووراندا شمر دینن وورما نا توانادی
آدی رقیّه دی امّا شبیه زهرادی
اگر چه اهل حرم بو قیزی سویَر زینب
وَلیک ،اهل جفا روز و شب دویَر زینب
اسیر اولار باشینا قمچی لر دَیَر زینب
آنام کیمی غم اونون قدّینی اَیَر زینب
بتوله نایبه دی ،عزّ و شأنی والادی
آدی رقیّه دی امّا شبیه زهرادی
دیَنمدی بو بالا شام یوللارین گیده جاق
الینده قمچی گلوب زَجر اونوی چوخ اینجیده جاق
قلوبِ اهل دیله داغ هجرینی چکه جاق
دیَنمدی گجه ویرانه یرده جان ویره جاق
اگرچه سینّی کیچیک دی ،بَلاسی عُظمادی
آدی رقیّه دی امّا شبیه زهرادی
دیَنمدی باشینا قاره معجرین آچاجاق
الینده طاقتینی شمر بی حیا آلاجاق
لوای محنتی اوجِ مصیبته ساچاجاق
دیَنمدی کی رقیّه خرابه ده یاتاجاق
خرابه گوشه سی هر (بیکَسه) غم افزادی
آدی رقیّه دی امّا شبیه زهرادی
- جمعه
- 29
- اسفند
- 1399
- ساعت
- 21:14
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه