ماه شعبان معظّم یتیشوب اولدی اوچو
خامس پنج تنه عشق و ولادت گونودی
قویدی دونیایه قدم نوگول زهرا و علی
هامی عاشق لر اوچون مژده،بشارت گونودی
نینوا دشتی ایشیقلاندی چیخیب شمس هدیٰ
کعبه تک رونقینه باعث امامت گونودی
درس حرّیتی انسانلار اوچون تعلیم ائدن
خطّینون پیرو وینه عزّ و سعادت گونودی
آنادان اولدی حسین ایستدی لعیا وئره غسل
بویوروب ختم رُسُل،غسله نه حاجت گونودی
پاک و پاکیزه گلیب دونیایا،پاکیزه گئدر
غسلی قان، دستمازی قاندی ولایت گونودی
آلدی آغوشه اوپوبدور لبینی حنجرینی
بویوروب قوی یاتا گهواره ده راحت گونودی
ترپدیبدیر بشیگین لایلایلان روح الامین
قانلی سجاده سالان عاشقه خدمت گونودی
گویده کی جمله ملائک دئدیلر ربُّ العظیم
اذن وئر نازل اولاق ارضینه رجعت گونودی
تهنیت عرض ائلیوب قونداقینا بوسه ووراخ
یا گئتیر عاشقینی گویلره زینت گونودی
افتخار ائتدی حسین قونداقینا عرش و سماء
فطرسه،شافع اولان عشق و زیارت گونودی
گلدی زهرای بتول،تا گوره نور بصرین
گوردی گهواره نی بوش،آغلیان عصمت گونودی
عرض ائدیب یوخدی بابا قونداقی گهواره سی بوش
هاردادی نور دو عین اولمویا فرقت گونودی
بویوروب اولما ملول،آغلاما ای میؤه دل
عرشه قونداقی گئدن اوغلونا عزّت گونودی
یئری وار عرض ائله یم آغلاماقیم وئرسه مجال
گَل خانیم،کرب و بلا دشتینه غارت گونودی
یئدی ضربتله باشی،ذبح اولان اوغلوندی حسین
وار یوخون بذل ائلیوب دینه حمایت گونودی
بی کفن قوملارین اوستونده یاتیب سینه گولون
آی لان اولدوز توکولوب یئرده قیامت گونودی
گوز یاشیم جوهریلن،یازدی قلم قلبه حسین
بو قوجا نوکرینه ائتسه شفاعت گونودی
ورد و ذکریندی ((ریاحی))سنون هر وقت دعا
کربلا زائری اولماقه اجابت گونودی
- دوشنبه
- 2
- فروردین
- 1400
- ساعت
- 23:6
- نوشته شده توسط
- یوسف اکبری
- شاعر:
-
محرم بابازاده
ارسال دیدگاه