بو حسین آدی دیلیمده سند سعادتیمدی
منه آغ یاراشماز اصلاً قره گیماخ عادتیمدی
بیر عومور قرا گیینم،آغارا فقط بیر آنیم
منی قبره قویلویاندا،بو قرا اولا نشانیم
گله بو قرایه خاطر،باشیم اوسته شهشهانیم
نفسیله دولسا قبریم،بو منیم کفایتیمدی
چمن حسینه هر کیم،گول اولا خزانلا صولماز
که حسینون آغلیانی،گوزی حشریده یومولماز
او که قلبیدن یانیبدی،اونا بیرده آتش اولماز
ولی گر حسین اودیلا،آلیشام رضایتیمدی
دئسه لر اگر اولوبدی،بیر حسین چی آغلیون سیز
اونی تشییع ایلینده،قاپیسندا ساخلیون سیز
نچه ایل گیین قراسین،باشی اوسته باغلیون سیز
که اونا دئسون آقاسی،بو گدای ساحتیمدی
او زمان که دفن ائدنلر،منی بیر داریش مزاره
دولار آتشیله قبریم،بدنیم دوشر فشاره
پوزولار عیار جسمیم،منه فاش اولار شراره
اگر اولسا قطره گوزیاش،او اودا ضمانتیمدی
سوروشارسا گر ملائک،نئدور عمریوون پیامی؟
عملون که معصیت دور،نه یازاق سنه ختامی؟
دییرم که اولموشام من،بیر عمر حسین غلامی
یازون عاشق حسین دی،بو منیم حکایتیمدی
من اونا غلام اولاننان،بیلیرم غلامین آتماز
کرم عالمینده هئچ کس،کرمی حسینه چاتماز
که گئدنده نهره بیلدیم،آقا نوکرین یوباتماز
دئدی قارداشیم دی عباس،شرف بو نهضتیمدی
دئدی فرقتون حسینه،بو زمان عیان اولوبدی
علمون،قولون،سو مشکون،یولوما نشان اولوبدی
نیه ماه صورتون بس،بورونوبدی قان اولوبدی
دئدی قان دگول بو صورت،عرق خجالتیمدی
دای اینانمیرام بو آن دان،منه بیر چتین چاغ اولسون
یارالی باشون تک عباس،اؤرگیمده بیر داغ اولسون
دئدی بوشلا باش یاراسین،باشین ای اخا ساغ اولسون
دیزون اوستده قالسا باشیم،نچه لحظه راحتیمدی
سینه می غمون حسین جان،الیوبدی رشته رشته
الع حاله قالمیشام چی،منه آغلیور فرشته
خجلم من اصغروندن،بئله گئتمرم بهشته
منی آغلادان بو حال دا،اثراتِ غیرتیمدی
نجه دولماسین قانیلا،نگران قالان بو گوزلر
بو گوزی خیامین ایچره،که ملر بیر آهو گوزلر
نجه غرق اولار عمو سی،که رقیه سی سو گوزلر
گوزی یول چکور او ایندی،اورگیمده حسرتیمدی
- دوشنبه
- 2
- فروردین
- 1400
- ساعت
- 23:31
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه