باشلا یا حق دِی قلم باغلا ریانین گؤزونی
نقش ائله دفتره استاد قلم لر سؤزونی
ششمین هور فروزان امامتدن دِی
فضلیدن،منطق دن،عشق و عبادتدن ده
عِلمینون بحرینی تشریح ائله سن مُردابه
توشۀ حُبّیله بیر تحفه گئتور احبابه
مکتبین یازگیلان اول عزّت پا برجاسین
افتخاریله چاغور شیعه لرین مولاسین
قوی بیلوب فخر ائلسین شیعه لرون اولادی
کیمه نوکردی اولوب مذهبینون استادی
فاش ائله خوان تشیع دَه کی غیرت دادینی
خط چکیب دفتره یاز حضرت صادق آدینی
گَلجَگین صادق آدی گَلدی بو طبعیم شوره
گئتدی تاریکیِ دل،وئردی مکانین نوره
کیمدی صادق که آدی دهره سالیب آوازه
جنّتین باغلارینا عشقی اولوب دروازه
کیمدی صادق که ساچور نور کمالاتیندن
علم ئوزی بهره توتور جمله رسالاتیندن
صادقون مدحتینه کلمه گلور نا کافی
وصف معناسینی توصیف ائلییر اوصافی
شیعه نین شامینه جهدی وئروب آیدین سحری
بجروب دانشی تسخیر ائدن علّامه لری
عِلمینون کلمه سی مین لرجه مجلّد پندی دی
بارماقین بؤلسن اونون مین بئله دانشمندی دی
صادقون علمی اولوب دینه آغیر سرمایه
عُلما لر له ووروب دین طاقینا مین پایه
نه فقط علمی ،که غیرتله وجودی جالانیب
شیعه بُحراندا اونون غیرتینه دالدالانیب
کیمدی صادق که کراماتیله لبریز اولموش
تیغ اسلامیدی که منطقیله تیز اولموش
درس عزّت قازانیب یدّی ملک منظردن
مدرک شأنی آلیبدور خود پیغمبردن
اخذ ائدوب عصمیتینی فاطمۀ اطهردن
غیرتی ارث آپاریبدور آتاسی حیدر دن
مجتبی وئرمیش اونا صبر و سخاوت درسی
کربلا شاهی وئروب شور شهادت درسی
ساجدین سجده سی هر سجده سینه ناظر اولوب
شاخه علمینه باعث شجر باقر اولوب
اونون احساسینه جبریل اوزوده مشتریدی
شهپر کلّ ملک صادقون انگشتریدی
فقهیدن جمجمۀ شیعه نی سرشار ائلیوب
مکتبین مُنکرینی منطقیله خوار ائلیوب
شیعه نین کوچۀ تنگین ائلدی آزاد راه
منطقیلن وئروب هر شیعه یه بُرّنده سلاح
خفقان دوره ده موسیٰ کیمی بیر طور ائلیوب
مکتبین هر نقدر دشمنی وار کور ائلیوب
نهضت عشقی جهانی ائلین صادق دی
کیم اونی ردّ ائلسه پست دی نالایق دی
بیله فکر ائتمه تقیّه ، یولونی تنگ ائلدی
غاصب حقیله تا واردی نَفَس جنگ ائلدی
روبرو اولدی اوگون دشمن سر سختیندن
سالدی بیرنطقیله منصوری شرف تختیندن
دیدی جان فکری اگر ایلسم عاشق دگولم
یخماسام دولت عصیانگری صادق دگولم
یعنی پاینده دی هر برهه ده حریتیمیز
ایلمز ننگی پذیرش بلی شخصیتیمیز
بیز هدی مشعلیوخ ، حقدن عدول ایلمروخ
باشیمیز گیتسه ده ظلامی قبول ایلمروخ
کربلائی ام،حسینی ام و هم جعفریم
سنی رسوا ایدرم زینبی ام،حیدریم
حاکم جور اودم گوردی شرایط بئله دی
خطری دایره مسندینه حس ایلدی
ظلم تاریخینی قیتردی دوباره دالیا
قصد ایدوب باب امامتده گئنه اود قالیا
حاکم وقت حجازه یتیروب فرمانی
اودلایون بیت امامی قوتارون جریانی
تائب اعراب گینه جهلینی اظهار ائلدی
سیندیروب توبه سینی ظلمینی تکرار ائلدی
بورویوب حضرت صادق قاپیسین شعله نار
آتش ظلمیله تشویشه دوشوب محرم یار
یر زبانه چکیب اود منزله چاتدیردی اوزون
اولیاء اوددا که مظلومه باخیب یومدی گوزون
قویمادی لیک یانا حضرتی اهل ایمان
مین مشقّتله امامی قوتاریبلار اوددان
گر روا گورسه خدا واردی بی نیسگیل عرضیم
یازماسام بو سوزی درد اهلینه وار چوخ قرضیم
اَسینوب باد خزان گئچدی سوزوم یازلیخدان
گینه سوز غربت اولوبدور وای آدامسیزلیخدان
بو همان اوددی یانییب درب خانم زهراده
بو همان اوددی قویوب داغ دل مولاده
صادقی یاری باشندا واریدی روز بلا
قویمادی یاری اونی شعله آتش ده قالا
ولی زهرانون او لحظه ئورگی داغلیدی
واریدی بیر نفری تک که قولی باغلیدی
ظلمیدن توسدی او هنگام گویه قوزاندی
باخدی چشمان علی،سینه زهرا یاندی
یاز *امین* تا که بیلینسون نجه بیر ظلم اولدی
نجه اشکیله اودم دیده زینب دولدی
- سه شنبه
- 3
- فروردین
- 1400
- ساعت
- 13:41
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه