سوسوز اولن کبوتریم - ربابه سس وئر اصغریم
بوغازی یاره دلبریم - ربابه سس وئر اصغریم
بو شب ده قورخولی چولون،دوتوبدی غم فضاسینی
تـــــوکور ترابه گوزیـــــاشی،گـــــزور آنا بالاسینی
باسوبدی باغرینا رباب،ئـــــوز اوغلونون لباسینی
سینم ده قالدی اللریم - ربابه سس وئر اصغریم
بو توپراق آلتدا یاتماقون،خزان ائدوب بهاریمی
یوخومدی بیر کسیم بالا،ائشیت نوای زاریمی
او آغلاماق سسون اوغول،آلوب منیم قراریمی
دؤشوب منیم ده حنجریم،ربابه سس وئر اصغریم
او وقتیدن که گئتموسن،قارالدی روز روشنیم
سرشکیلن چاتار باشا،ئولونجه هر گونوم منیم
ئولنده ده اولـِـیدی کاش،سنون یانندا مدفنیم
منیم پناه و سروریم - ربابه سس وئر اصغریم
او اوخلی حلق نازیوون،گلنده قانی باخمیشام
من او عزالی کوکبم،که محنتونده آخمیشام
دور ایندی گور که توپراقی،بو ساچلاریما یاخمیشام
سنه فدادی تـِـللریم - ربابه سس وئر اصغریم
خیال ائدردیم هر زمان،که سن منیم یانیمداسان
بو بند آرزو لـــــری،نولی آنوندا قیرماسان
دوشوب فلاکته باشیم،منیم یارالیم هارداسان
اولوبدی روز محشریم،ربابه سس وئر اصغریم
یوزون گوزلدی یوسفیم،قاشوندا آی هلالی وار
که فرقتونده بیر آنا،ئورکده مین ملالی وار
مگر سنون تک عاشقون،بو دونیادا مثالی وار
اولان فروغ انوریم - ربابه سس وئر اصغریم
- سه شنبه
- 3
- فروردین
- 1400
- ساعت
- 14:27
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه