عشق عالمی آشوبه گلوب جوهر طبعیم
لبریزیدی احساس غمه ساغر طبعیم
جوهر آرا ال تاپدیم ازل مطلبه گویا
روحیم قوشولوب دخت علی زینبه گویا
زینب آدی گلدی گئنه سهل اولدی وصالیم
بیر بحر خروشانه دؤنوب شط خیالیم
واللّهی نه وار بیلمیورم زینب آدیندا
یازدوقجا شجاعت گورورم زینب آدیندا
حورالر اوچون مشقیدی بو زینبون آدی
اعلاء سخن عشقیدی بو زینبون آدی
جان ستمـه واهمه دی زینبون آدی
نامِ دگر فاطمه دی زینبون آدی
حیدر آدینون زینتیــدی زینبون آدی
الله قانیـنون قیمتی دی زینبون آدی
غم کش لره روحـیـّـه دی بو زینبون آدی
حق دیللره نشـریـّه دی بو زینبون آدی
بی چاره لر آئینه سی دور زینبون آدی
مظلوم لرون سینه سی دور زینبون آدی
آزادیـّـتون هِیکلیدی زیبون آدی
شاه شهدا مقتلیدی زینبون آدی
کیم دی بو خانم داغدان اوجا همّتی واردی
هر محفل غیرت ده اونون صحبتی واردی
کیم دی بو خانم رمز بقا غیرته وئردی
کیم دی بو خانم درس شرف امّـتـه وئردی
کیم دی بو خانم ییخدی یئره مین بئله مـَردی
یاندیردی جفا ریشه سینی آتشِ دردی
کیم دی بو خانم منطق آرا آدی مـَـثَل دی
بیر کـلـْمه سی پیکان سایاقی دشمنی دَلدی
کیم دی بو خانم شهرت دیرینه سی واردی
اهل حسدیلن دل پر کینه سی واردی
کیم دی بو خانم بند اسارت لری قیردی
حق پرچمینی بزمگه باطله ووردی
کیم دی بو خانم عصمتینی ائتدی مجسّم
حسرتله باخار شوکتینه مردم عالم
کیم دی بو خانم قدرت آلوب شاه نجف دن
هند اوغلو تا روز ابد سالدی شرفدن
کیم دی بو خانم گؤرسدیب آثار رشادت
تاریخیده وار کیم ده بو اندازه شهامت
کیم دی بو خانم درد و غمه مشتری اولدی
تصویر بلا نقشه ی انگشتری اولدی
کیم دی بو خانم ایندی ده چوخ دشمنی واردی
امّا نه صلابت له قالان مدفنی واردی
بیر نابغه بانودی بو تاریخ بشر ده
اسلام آدینی حفظ ائلدی پشت سپر ده
کیم دال چووروب زینبه تز راهین ایتیردی
هر کیم که چاغیردی آدینی فتحه یئتیردی
پس جوششه گل خامه دئنن کیمدی بو زینب
پایان وئروب آلامه دئنن کیمدی بو زینب
محنت یولونون عاشق شیداسی دی زینب
مجنونیدی ثارالله و لیلاسی دی زینب
حق حیطه سینون ذرّه رخشانی دی زینب
قارداشینون حق اوسته باتان قانی دی زینب
میدان مصییاته رجز خوانیدی زینب
آند اولسون علی جانینه طوفانیدی زینب
ظلمت گئجه نین جلوه لی فانوسیدی زینب
عاشور بلانین بلی ناموسیدی زینب
نطق عالمی زهرا ائوینون پیری دی زینب
جنگ عالمی حیدر الینون شیری دی زینب
اسرار بلا دشتینه آگاهیدی زینب
ثارللهـّین حلقونده اولان آهیدی زینب
دیلده بوغولان غصه لی احساسیدی زینب
هم قاسم و اکبردی هم عباسیدی زینب
یتمیش ایکی جانبازه ئورک داغلیان اولدی
اردوی پریشانه علم ساخلیان اولدی
اسرار بلایانی ائدوب قلبیده توشه
دیل یاره لی کوفه دولانیب کوچه به کوچه
عریان دَوه لر اوسته گئدور غملی قطاری
آغوشه آلور قمچی گویردن بالالاری
دشمن ده عیان اولدی او گون شدّت جهلی
داش وورماقا آماده اولوب کوفه نن اهلی
دیداره گلوب وجد و سروریله جماعت
بیرده ائده لر یاره لی باشلاره اهانت
گوللر یئرینه باشینه کوللر اَلـِـیوللر
بیرده اُسرا یاره سینی تازه‌لِیوللر
زینب دی آچان هر گرهی وقت بلاده
قیزلاردا بیر گؤزی،بیر گؤزده جداده
بیر باخ دئدی غمخواریوه سرنیزه ده قارداش
باشسیزلاریوی ایلدیلر غمزده قارداش
بو حالی گوروب عترتیوه آغلاموسان سن
قیزلار دویولور گوزلریوی باغلاموسان سن
آند اولسون آنام فاطمه یه منده دؤزوم وار
بیر نیزه باشیننان منه باخ دیلده سؤزوم وار
عالم بیلوری چوخدی سنه قارداش علاقم
من عاشق قرآن اوخویان قانلی دوداقم
عفو ایله منی گر ائلسم شیون و ناله
پرپر وورورام من بیلوسن شوق وصاله
بو کوفه لی لر عادت ائدوب آتماقا داشه
رحم ایلمز حتی بو کسوک یاره لی باشه
سن ایله دعا قدّیمی غم أگمیه قارداش
بیر ایش گورورم غیرتیوه دگمیه قارداش
ئولسم ده حسین شامه کیمی باشون آپارّام
داش دگسه سنون باشیوه من باشیمی یارّام
هر نوعیدی زینب بو مصیباته دایاندی
قلبینده اولان جام شکیباسی جالاندی
سر گشته گزوب چوللری جان جان دئدی یاره
اول یاره لی باشدان گئده بیلمزدی کناره
گوز گوزده گلوب شامه کیمی زینب او باشلا
دریایه دؤنوب باخدیقیجا گوزلری یاشلا
باجی دولانان یئرلره قارداشی باخوردی
زینب ده بیر اولدوز کیمی محنت ده آخوردی
بیر یئرده ولی یومدی گؤزون اول نگران باش
تاب ایلمدی باخماقا ویرانه ده قارداش
ویرانه لی لر، باغلی گوزون گوردی حسینی
او لحظه کی سسلندی بابا،نور دو عینی
حسّاسیدی زینب او شیرین دیللی بالایه
دوزمزدی رقیه قوشا سس آه و نوایه
اول شب که رقیه ایاقی باغلی وئروب جان
ال باشدا هراسان دولانیب زینب گریان
آلمیشدی قوجاقه بالانین جسم ضعیفین
اول قمچی اذّیت ائلین جان نحیفین
آرام او قیزون قیرداجا قولارینی آچدی
هجران اوخونی سینه ی درد اهلینه ساچدی
دورت گوشۀ ویرانه نی گزدیردی هراسان
گوز یومدو بالا سسلدی زینب گل حسین جان
شیرین سخنون خسته دی زینب قوجاقیندا
جان وئردی بابا آدی او یاره دوداقیندا
بو لحظه ده آواره لیق حالیله بوروشدوم
آواره قالان ساعتیوون یادینه دؤشدوم
ایندی بیلورم لحظه آخر نه چکوبسن
قالمیشدی قوجاقینده که اصغر نه چکوبسن
نه نوعیله میدانی دولاندیردین حسین جان
عالم ئورگین حالیوه یاندیردین حسین جان
نه خیمه یه گلدون نه ده میداندا دایاندون
قیزلاردان اوتاندون اودی تل اوسته یوباندون
درک ایلدیم ایندی نه چکوبسن آتام اوغلی
اوچ پر اوخی نه نوعی چکوبسن آتام اوغلی
- سه شنبه
- 3
- فروردین
- 1400
- ساعت
- 14:33
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه