آچیلوب بند اسارت یارالی دیللردن
غربت ال چکدی او دم زینب غم پروردن
دفن ائدوب تربت ویرانه یه غملی یارین
آغلیان گوزلریلن ائتدی وداع دلبردن
دئدی عفو ایله که بوردا سنی یالقوز قویدوم
گلرم غصه یئمه سویلویرم غملردن
گئدورم آغلاماقا اکبریله عباسه
إیلیم شـِـکوه بیاباندا گئچن گونلردن
قلبینه ییغدی علینون قیزی هر آلامی
باغلادی بار سفر پاره ی نیسگیللردن
دورینه دوزدی گئنه غصه لی اولدوزلاری
إیلدی عزم زیارت سارالان گوللردن
ترک ائدوب شامی او ویرانه‌نشین فاتح لر
اذن آلوب دؤشدی یولا فاطمه ی اطهردن
کربلا عطرینی بلبل کیمی زینب آلدی
راه عشقی سوروشوب چولده اَسَن یئللردن
قوشولوب قوشلارا روحی نئجه پرپر چالدی
تاگؤروب جلوه‌ی گلزاری اوزاق منظر دن
گورجگین زینب او صحرانی او پوزون قبری
ناقه‌دن سالدی اؤزون، دوشدی یئره شهپردن
یوز گوزه یاخدی او دشتین گئنه ده توپراقین
باشلادی روضه‌ی مقتل بو سری ازبردن
اَل قویوب سینه‌یه سسلندی باجی،قارداشین
السلام ای گئچیلن باشی ایتی خنجردن
حرمون خسته‌دی یول یورقونودی دور قارداش
پیشواز إیله نواخوان یئتیشن صفلردن
گوروسن گلشن آرا بیر گُلِ نیلی‌م، کم دور
خبر آلما نئجه صولدی او گولون،خواهردن
اولمادی ممکنــیم آغلاشماقا عاشوراده
گلمیشم اشکی سرازیر ائلیم گوزلردن
قالمادیم یاره‌وه سینونده ائدم بیر چاره
ناگرانیدیم اخا اول بدنِ بی سردن
نیزه دالیندان حسین رأسیوی تعقیب ائتدیم
چنگ و دندانیله آلدیم باشیوی اللردن
باجون اولسون او چخور مقتله عریان دوشدون
گــَـه کفن‌سیز سورونوب،گــَـه دایانوردون هَردن
اولمادی لیک سالام بستریوه قاره ساچی
سـَـرمیشم قبریوه ایندی آغاران تئللردن
دوشمسیدیم سینم اوستونده اگر توپراقه
تئز چیخاردی که رقیّم کیمی جان،لبلردن
هله چوخ آغلامامیش قوی دانشیم بیر مطلب
بیر جوان مادره خاطر گئچورم سؤزلردن
هامی غم بیر یانا امّا ائشیدوب هِی یاندیم
آنالار لایلایی‌نی، بوش بشیگه مادردن
تا هلاک اولمامیش اول بختی قرا،بیر دیندیر
وئر خبر خسته ربابه بالاسی اصغردن
صورا وئر بو نگران قیزلاریوا دلداری
پیشواز إیلمسون، بیرده سلام آل باری
دور مسافرلریون توشه‌لری حسرت دور
بیرده گوزیاشلاری وار،تحفۀ کم قیمت دور
قمچی‌لر قورخوسی قویموردی توکاخ گوزیاشی
ایندی که یوخدی ووران، آغلاماقا فرصت دور
قیزلارون قوللاری زنجیردن آزاد اولوب
حرکت إیلمقه هر طرفه راحت دور
بیرده شیرین دیلون آغزیندا دولاندیر قارداش
چاره آلامیله دولموش ئورگه صحبت دور
کربلادن گئده‌لی هر نه اولوبدور تا شام
ییغیشوب داغ کیمی،سینم دوتانی محنت دور
هش کیمه شرح و بیان قیلمامیشام غملردن
بوراجاق صبر ائلدیم، سنده ائشیت منّت دور
سنی اؤز غیرتون اولدوردی اخا،دشمن یوخ
منده غیرت اثری، خم اولونان قامت دور
منه تاپشیردیقون ائللردی گلوب فریاده
بو همان بختی سیه لردی،همان نهضت دور
سن ئولن‌دن دی گییوب لر بدنه رختِ عزا
باشی ماتم زده‌یه، قاره لچک زینت دور
سنی زهرا، یارالی سینه‌وی بیر باز ایله
آل بو بی کس لری آغوشیوه که غربت دور
گلمیشم،دوزدی پوزوب قافله‌می طوفانلار
یاری جان زینبه دیدارون اخا،نعمت دور
غم مسیرینده گئدوب نقطه به نقطه گزدیم
کربلا توپراقی آخر باجیوا قسمت دور
شامیده بی کس و تنهادی رقیّم افسوس
یانینا گئتملیم، رسمِ وفا رجعت دور
یوخسا جانندان اَل اوزَدیم که مزارون اوسته
بیلَسَن فدیه ی جان، خواهریوه عزت دور
- چهارشنبه
- 4
- فروردین
- 1400
- ساعت
- 19:32
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه