سویله گر اسلامی ائدوبسن قبول
صلّ علی قرة عینِ الرّسول
فاطمه یه باغلا ئورک بندینی
تا آچاسان معصتین بندینی
گل علوی مکتبینه همدم اول
بحر مصیباتبده غرق غم اول
بوشلا بو بی عهد و وفا عالمی
ئوزگه بیر عالم دی عزا عالمی
گل اول ئوزون سائل خیرالنساء
ایلمه بیگانه لره اعتنا
سائله احسان اِلیین دور خانم
دردیوه درمان اِلیین دور خانم
دوگمه بیر ئوزگه در میخانه سین
مست ائله اوّل ئورگین خانه سین
شمع شبستاندی بیزه فاطمه
عشقیده برهاندی بیزه فاطمه
داشسا اگر بزمیده پیمانه لر
رسمیدی جاننان گئچه پروانه لر
شمعیدی زهرا اونا پروانه بیز
عشقیدی زهرا اونا دیوانه بیز
ئوزگه یانان شعله لره یانماروخ
جان دا وئرخ عشقینی بیز دانماروخ
خوار اولا هرکس تانیمور مکتبی
آنلامیوب دینی ، نه ده مطلبی
ظاهر ناحقّه باخوب،حق گوروب
ظالمه دیوار حمایت هوروب
باغلی دوتوب امته درب رجا
دینه خلیفه چخادیب نابجا
نفع بیر اشخاصه گوره حق دانیب
توده ملت ده ولی آدلانیب
صاحب حقدن سندی سلب ائدوب
رأی عوامی اؤزونه جلب ائدوب
مجرم ئوزی حکم قضاوت تاپوب
جمع جهالتده جلالت تاپوب
امر رسالت دن عدول ایلین
مطلب ناحقّی قبول ایلین
گؤزلره پنهان ائلیوب حجتی
بیعته وادار ائلیوب امتی
امر ائلیوب قلبلری داغلیون
گئلمسه کیم قوللارینی باغلیون
بیت مخالف لری اودلاندیرون
وئرمسلر یول، قاپیسین یاندیرون
ملتی که عشق ولا آنلاماز
کینه و خصمیله قیلالار نماز
جهل لری عقل لریندن قوی
امر شیاطیندن ائدوب پیروی
خانه ی وحی-ی- هدفینده عموم
کوی بنی هاشمه ائتدی هجوم
دربه مقابل ییغیشوب چوخ عرب
فاطمه دن حیدری ائتسون طلب
سالمیالار ایشلرینی زحمته
تا چکه لر حیدری ده بیعته
فاطمه کی حیدره همرازیدی
جبهه ی عشقینده سرافرازیدی
وئرمدی فرصت عرب جاهله
قویمادی نا اهل لری منزله
یوز توتوب اعرابه او روح وقار
وئردی ولایت سوزونه اقتدار
سسلدی ای قوم اسارت پرست
فکر خلافت سیزی ائتموش نه مست
بعد نبی قلبیمی چوخ غم یوروب
بعضی لری فتنه اساسین قوروب
چون باشینی قویدی یئره مصطفی
خلع خلافت اولونوب مرتضی
حج وداعیده ددی خطبه نی
وئردی آتام حیدره بو رتبه نی
حق علیدور بو خلافت یولی
چون اودی دنیاده عدالت یولی
روشن اولوبدور چوخو غفلتده دور
فکر ریاست و خلافتده دور
امته بو ظلمی روا قیلمیون
امررسالتدن هئچ آیریلمیون
باغلیا بیلمزسوز علینون الین
فاطمه حامی دور اونا،دینجلین
آنلیون حق اوسته یم،آزادیم
مدرکه بو بس که نبی زادیم
عالمه مهتاب دل آرا منم
رحمت اول خالق یکتا منم
لازمه ی روضه ی رضوان منم
باعث خشنودی سبحان منم
جان بو منظومه یه جانان منم
روح شرف،پیکر ایمان منم
صبر و قرار دلِ پیغمبرم
قبله گهِ درب کَنِ خیبرم
شیرزنم،شیرزنه مادرم
فاطمه یم،فاطمه ی حیدرم
شمعیمه پروانه لیغه لایقم
شوهرِ با غیرتیمه عاشقم
قویمارام عشقین زِرِهین من یئره
عاشق مستانه گرک جان وئره
حقّیله انصافه گوره قان وئره
لیک محال ئیدی که ایمان وئره
گرچه خلافت سَنَدی غصب اولوب
مسندینه غیر علی نصب اولوب
قلبیمی گر درد و مصیبت سیخا
صبر ائویمی ظلم مشدد ییخا
گر یولومی یول کَسَنیم باغلیا
حالیمه اوغلوم حسنیم آغلیا
داغلانا قلبیم غم اودیلان اگر
ترک ائلیر فاطمه عشقین مگر
ائتدیگیم عهد اوسته وارام دؤنمرم
شمع حرم خانه کیمی سؤنمرم
حقّی قویوب،باطله یول وئرمرم
حقّ علیدن صوراسین گؤرمرم
عشق علیدور ره تقوا منه
اوّل و آخر اودی مولا منه
ای قاپینون قیرماغینا زور ائدن
درد و فشاره منی مجبور ائدن
بیر کمکه گئلمین ای قونشولار
شاهد اولون،اهل ستم دیر بولار
اودلامیون حق قاپیسین ای عوام
شور جهالت ده قالیبسوز مدام
دقت ائدون بیر سؤزومه سیز صورا
سویله نئدن جمع اولونوبسوز بورا
وئرمیون امکان سیزه لعنت دییَم
تانریدان ئوز ئولمگیمی ایسدیَم
سائل اولوبدور بو دره هر ملک
یانسا بو در اودلاناجاق نُه فلک
حیدری فرض ایلمیین بی کمک
فاطمه قویماز قالا دلداری تک
قانیمیله عشقیمه ورّام محک
راه شهادت گئده عاشق گرک
گر در و دیوار آراسیدی تنگیدی
سنگری ترک اِیلمه گیم ننگیدی
قوی در و دیوار اولا سنگر منه
شیرخدا دور ائله رهبر منه
گر سینه مه یوزمین عدد میخ باتا
لحظه ده قویمام عَلَم حق یاتا
دنده لریم ضرب دره سینسا دا
اود آراسیندا ئورگیم یانسا دا
کوچه ده راهیم منه باغلانسا دا
قلبیم اگر ظلمیله داغلانسا دا
من ایاق آلتیندا اگر جان وئرم
محسنیمی حیدره قربان وئرم
آتمیاجاق فاطمه ئوز یارینی
ئولسه ده ساتماز بو هوادارینی
عشق علی عمریمه سرمایه دی
دختر طاها باشینا سایه دی
روز قیامت دییرم تک کلام
عالمه سروردی علی،والسلام
- چهارشنبه
- 4
- فروردین
- 1400
- ساعت
- 20:0
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه