چکور جانیم اذیت کینهٔ اشرار دنیادن
یتوبدی عرشه نالَم ای خدا دیوار دنیادن
نه ائتمیشدوم که سالدی باشیمی دنیا مصیباته
اولان بیر تکجه سن سن با خبر اسرار دنیادن
سرای عشقیدن آیریلدی جانیم محبسه دوشدی
بهار گلشنیم اولدی خزان آزار دنیادن
عیال و اهلیدن کچدیم،یوخوم بیرکس کناریمده
بقای دینه خاطر اوزدوم أل پرگار دنیادن
ائدور مظلوملاری محکوم،اولور ظالم لری حاکم
حقیقت دل ده بیزارم بئله معیار دنیادن
ألیمله نقدِ جانی وئرمیشم والا تجارتده
غُل و زنجیر و زندان آلموشام بازار دنیادن
ملاقات إیلیَن یوخدور،گوروب حالیم دییَن یوخدور
نئدن ای عشق اسیری دولموسان غمبار دنیادن
دییردیم محنت ائتموش سینه‌می غمخانه غربتده
قالوب حسرت گؤزوم دستِ خیانتکار دنیادن
گلوب اوغلوم آچِیدی قاپلارین بو غملی زندانین
گوروب آسوده باغلاردیم گؤزوم بو دارِ دنیادن
آلوب بو ناله‌می باد صبا موسی بن جعفردن
رضایه سویلویَردی مختصر ایکاش او ازبردن
بو نیسگیل غرق ائدن سینَم‌ده داشمیش محنتیم اوغلوم
آلوب جانیمدن عشقین اشتیاقی طاقتیم اوغلوم
گرفتار اولموشام من دام بیر صیاد ظالم ده
یوزون بیردم زیارت ائتمگه یوخ فرصتیم اوغلوم
گمانیم واردی کسمزسن بو گؤزلردن سن امّیدی
واریمدور بیر سنه آخر نفس ده زحمتیم اوغلوم
بو زندانه گلوب بوینومدا کی زنجیری ردّ إیله
قوجاقلاش بیر منیله تا قوتارسین حسرتیم اوغلوم
قرا زندان لار عمرومدن آلوب ظلمیله چوخ ایللر
سماده آغلادار زهرانی سونسوز غربتیم اوغلوم
بئله غمخانه کُنجینده منی بیر کس دانیشدیرمور
گلوب بیردم دانیشدیرسان منی وار صحبتیم اوغلوم
سویوق توپراقلار اوسدونده یتیش قویما چیخا جانیم
بلالی باشیمی آل سینون اولسون راحتیم اوغلوم
گلوب گورسون گؤزوم نمناکیدور قلبون داریخدیرما
عذاره جاری ائتمک گوزیاش اولموش عادتیم اوغلوم
وطن مهجوری اولدوم،دوزدی غم جانیم سیخوب امّا
اوجالدی قدیمی أگدیقجه زنجیر عزتیم اوغلوم
ستمگر زورینه باش أگمرم ئولسم ده جدّیم تک
منه خوش دور قفس توپراقی اولسا تربتیم اوغلوم
او وصلت بخش ألین‌لن گل،یوزومدن قان سرشکیم سیل
او مَه رخساریوه قوی بیرده گولسون صورتیم اوغلوم
منی دفن إیله بو بوینومدا کی زنجیریله باهم
اسارت له چیخب جانیم قوی اولسون قسمتیم اوغلوم
- چهارشنبه
- 4
- فروردین
- 1400
- ساعت
- 20:7
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه