ساخلیون سؤزلروزی دیلده گلایه باجیلار
چاتدی وقتی گئدیروک کرببلایه باجیلار
بار محنت‌لروزی توشه ائدون بو سفره
گؤزلر آماده اولا سیل بُکایه باجیلار
شامیده هر نه گؤروبسوز ئورگه دفن إلیون
یاسی قالسون توتاریق وقت عزایه باجیلار
هر کیمون یاری ئولوبدور ائله‌سون اونلا وداع
تاپشیرون قبرینی غربتدی،خدایه باجیلار
کربلاده ئولنوز اولسا اگر من کیمی سیز
قوشولون دسته ی ماتم‌له نوایه باجیلار
نه ووران وار نه ده کی بنده چکن اَل قولوزی
آچیلیب بند اسارت اُسرایه باجیلار
گئدیروک آغلاماقا قانه باتانلاریمیزا
دشت ماتم ده کی جسم شهدایه باجیلار
قلبی آزرده یاتیب پیکر قرآن اورادا
داغیلوب صفحه لری آیه به آیه باجیلار
گؤزلیور عترتینون یوللارینی شاه هدیٰ
منتظر گؤزلریدی آل عبایه باجیلار
تئزلیقی‌نن ائلیون عزم سفر تا گئده‌قون
سالاقون اوردا مزار اوستونه سایه باجیلار
صبر ائدون منده وداع ایلییم اؤز یاریمیله
جسم بی جانی وئریم دست قضایه باجیلار
گئدیرم من ولی ویرانه ده قلبیم قالاجاق
تا که همراز اولا دل خسته بالایه باجیلار
قبرینون اوسته توکر من کیمی قوشلار دا سرشک
بالامون إیلدیقی گیزلی دعایه باجیلار
شامین عورتلرینه تاپشیرون هردن بالاما
اولسا امکان اوخوسونلار نئچه آیه باجیلار
حسرتیدی وطنه قوش کیمی غربتده ئولوب
سالدی صیاد اونی ظلمیله بلایه باجیلار
شامین اهلی قویورام بوردا گؤزلریم گیله‌سین
سیزی آلله جمعه آخشامی وئرین فاتحه‌سین
- چهارشنبه
- 4
- فروردین
- 1400
- ساعت
- 21:52
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه