ای شه ملک رضا،عطری باهار سنده دی
قول دا نه وار کی آقا،هر نه کی وار سنده دی
دیل گرک اوّل درِ،رغبتینی باز ائده
گؤرمقه شاهین یوزون،چشم دگر باز ائده
وار نئیی سندن صورا،بو ئورگیم ناز ائده
ناز ائله وقریله سن،ناز و وقار سنده دی
شعله ی شمعونله من،باشلامیشام اؤز سؤزون
اولماسا قابل اگر،سن ده یازیم من دوزون
گنبدیوون جنسی یوخ،بلکه قیزیلسان اؤزون
زرگر اندیشه سن،کامل عیار سنده دی
هر گئجه یه خاتمه،نور سحردن دوشَر
ایستمه‌سن سن،دعا،گئتمز اثردن دوشَر
عاشقیوه باخماسان،آنی دَیَردن دوشَر
آل بو دیلی شاد ائله،چونکه بازار سنده دی
واردی یقینیم گؤرور،چشمِ گدابین لرون
دوگمه‌میشم هر قاپی،ردّ ائلدیم مین لرون
اولمادی قسمت منه،سویله گویَرچین لرون
بلکه سالا یول بیزه،حقّه شعار سنده دی
شمعیوون اطرافینه،جمله یانان دیل گلر
فوجیله بولبول سنه،باخماقا ای گول گلر
رسمیدی سلطانلارین،قاپسینا سائل گلر
قفل حوائج لره،تکجه آچار سنده دی
جنّتیدن هر سحر،واردی سلامون سنین
تخت ولا سنده دی،چوخدی مقامون سنین
ئولسه ده شاعرلرون،واردی دوامون سنون
حق کیمی جاوید سن،آیتِ یار سنده دی
وصل اولان ای رحمتی،ذاتِ حقِ سَرمَده
چوخدی دوگن بابیوی،باخ بو کلان درصَده
وئر ئورگین حاجتین،بیزده گئلَخ مشهده
یئر گزن آواره‌یم،کُنج و قرار سنده دی
- چهارشنبه
- 4
- فروردین
- 1400
- ساعت
- 21:56
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه