عیارِ هستیِ اعظم،عیارِ جان زهرادور
جمیعِ خلق اولانلار هامّیسی حیران زهرادور
وجود اطهر دلبند طاهایه سلام اولسون
بو عاجز نطقیده جزء ثناخوانانِ زهرادور
اجازم گر اولایدی خلقتین منده یازام شرحین
یازاردیم آدمه حقِ نَفَس، احسان زهرادور
تمام ثابت و سیّاره محو اولموش نگاهینده
وئرن منظومه یه فرمان فقط چشمان زهرادور
سخاسینده اونا یازسام صفت دریالری،آزدی
نه دریالر که اقیانوس ئوزی عطشان زهرادور
اگر انشا ائدوب زهرا آدیلان خلقتی ربّیم
تصرّف روح دنیایه دئمک امکان زهرادور
نشانِ عصمته دارا،مقام و رتبه سی والا
اولان آغازگر بو خلقته،عنوان زهرادور
گویون سیماسینی زیبا ائدن رخشنده اولدوزلار
فقط بیر گوشه ی زرّینه ی دامان زهرادور
نه اندازه گوزلیک که یارانمیش عرض دنیاده
مه و مهریله باهم جمله آویزان زهرادور
دئیوم من هانسی وصفی ساحت دربار زهرادن
مقام فخریلن جبریل ئوزی دربان زهرا دور
تمام خلق اولونموش ذره لر،اجرام و کیهان لار
ملائک،جن و انسان یکسره قربان زهرادور
یانار هرکیم که گورمز احتشام نام زهرانی
سالان انسانی رحمت دن اوزاق نیران زهرادور
نقدری زاهد اولسان دا قالارسان جنت آغزیندا
بهشتین قاپلارین تنها آچان فرمان زهرادور
ایکی دنیا سعادتمندی یازهرا دئین لر دیر
چکن عصیان اودوننان عاشقین،دستانِ زهرادور
دئسن یافاطمه درمان هر دردین اولار حاصل
بو قدرت اختصاصِ نام جاویدان زهرادور
علامت دور، نشانِ انتظار و انتقام عشقی
که هر بیر عاشقون قلبینده بو طوفان زهرادور
حسینه آغلیانلار مطمئن اولسون جزا وقتی
عزاداری باغیشلاتماق ازل پیمان زهرادور
اگرچه کامیاب اولموش ((امین)) احسان زهرادن
ولیکن غصه سی اول مرقد پنهان زهرادور
- چهارشنبه
- 4
- فروردین
- 1400
- ساعت
- 22:2
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه