دؤنوبدور قانه باغریم عم‌قیزی چارم کسیلمَق‌دن
کسیب امّیدینی یکسر علی بالمرّه گولمَق‌دن
چیخیب شیرازه‌دن غملر کتابی سالماقا گلمیر
کی حالیمدن بیری بیرگون ده اخبار آلماقا گلمیر
بو ائوده قلب‌سیز جسمیم‌ده والله قالماقا گلمیر
یورولدوم هر گئجه یاری بقیعه بسکه گئلمَق‌دن
مزارین اوسته گلّم تا دئییم اؤز حال و روزیمدن
ائوین سس‌سیزلیقینده قوزانان افغان و سوزیمدن
یانان پروانه‌سیز احوال شمع بی فروزیمدن
او زهراسیز قالان بؤش یئرلره گؤزلر تیکیلمَق‌دن
سن ایندی یوخسان امّا کی سنه اؤز جانلارین آغلار
آچیب دیل نوحه‌یه دردین کیمی درمانلارین آغلار
ائوینده قیزلاریندان چوخ سنه اوغلانلارین آغلار
اگر اشک اولسا دریا خشک اولاردی بو دردی بؤلمَق‌دن
حسینین قالماغین بیر گوشه‌ده هئچ بیر نفر بیلمیر
قالان دیواردا تازه قانیوی بو اللریم سیلمیر
بو بیر اعجازیدور والله کی سنسیز مرتضی ئولمور
چیخیبدور جان بو جسمیم‌دن و الّا کی سن ئولمَق‌دن
نه گؤردوم ماهیمون دورینده واردور هالهٔ ماتم
منه دردین دانشسایدین تاپاردیم بلکه بیر مرهم
ئورک بیمار اولاندا سینه‌ده قامت اولارمیش خَم
ولیکن ایندی بیلدیم من نئدیر علت اَگیلمَق‌دن
نئلر اولموشدی زهرا چهرهٔ خندانی گیزلتدون
او صولموش صورتینده غصّه‌ی دنیانی گیزلتدون
او وحشت کوچه‌سینده یوز وئرن جریانی گیزلتدون
حسن‌جانی خبرسیز قالمیشیدیم سن دویولمَق‌دن
فراقین خنجرین من بیلمزیدیم بیر بئله تیز‌دی
چاتان سندن منه بیر یادگاری لخته‌لی ایزدی
نه بیلمیشدون علینون دردینی زهرا،کمک‌سیزدی
کی گئتدی قلبیدن درمان و آرامین بو بیلمَق‌دن
دعا ایله گئلیم منده بو تئزلیقده او دنیایه
علاقَم قالمیوبدی عالمه سنسیز تماشایه
یازیلدی صفحه ی عمرومده سنسیز غملی بیر آیه
نه پوزماقدان اونی باشه چاتار دردیم نه سیلمَق‌دن
- چهارشنبه
- 4
- فروردین
- 1400
- ساعت
- 22:4
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه