تشنه لیک ائتدی آقاما چوخ اثر
سوزِ عطشدن قوری لبلر اَسر
تاب و توانی آزالوب حضرتین
باش گیجَلور٬ تاریدی چشم بصر
ساخلادی بیر لحظه آقا مرکبین
خیمه لرین سمتینه ائتدی نظر
سسلدی یارب اوزون امداد ائله
خیمه لره گیتمیه تا قومِ شر
رحم ائله یارب بالاجا قیزلارا
چاره ندور خیمه لره گئتسه لر
تَرسوزولور صورت زیباسینه
داخل اولور دیدهٔ شهلاسینه
ایستدی سیلسین آقا یوزدن تَرین
داغ یاریلار بو غمِ عظماسینه
دامن پیراهنین آلدی اله
حرمله نین باخمادی بلواسینه
اوچ پَر اوخون قویدی کمانه آتوب
تا اوتورا قلبِ پُر احساسینه
عفو ائله یامهدی صاحب زمان
سوز یتیشوب نقطهٔ حسّاسینه
یاردی حسین سینه سینی اوچ پَراوخ
سس یتیشوب حضرت زهراسینه
لطف ائله یارب گَلَه مطلب اَلَه
چوخ چتین اولدی بوآغیر مسئله
شادلیق ائدور شامیلرین لشکری
لشکر کوفه دایانوب ال اله
گوی دوتولوب نالیه عالَم گلوب
فکر ائلیورسن که گلور زلزله
اهل حرم شیون ائدوب آغلاشور
خیرداجا قیزلار ائلیور هلهله
اشک غمه باتدی هامی ماسوا
ارض و سماواته دوشوب ولوله
روح نبی جنّتی تَرک ایلدی
گلدی حسینی یخیلان مقتلی
اهل سَما عشقوی تحریر ائدر
عشق٬ اوزی آدووی تفسیر ائدر
گَر گوزوون گوشه سی سِیر ایلسه
دوزخیلن جنّتی تغییر ائدر
نیزه نین اوستن باشوون جلوه سی
گویده کی اولدوزلاری درگیر ائدر
واژه سنون مدحوه دلدن دوشر
عشقِ حسین٬عشقی زمینگیر ائدر
قاره علم نصب اولونا هر یره
قلبیمیزی عشقوه زنجیر ائدر
(فیضی) سنون مدحوه لایق دگُل
غصّه لرون شاعرووی پیر ائدر
- پنج شنبه
- 5
- فروردین
- 1400
- ساعت
- 11:47
- نوشته شده توسط
- یوسف اکبری
ارسال دیدگاه