قلم ایستور یازا ابروی علی اکبردن
ایلیور شرم وحیا روی علی اکبردن
چوخ تعجّبدی که بیرلیلی،هزاران مجنون
باغلانوب حلقهٔ گیسوی علی اکبردن
هرنه اندازه که دیوانه سی وارمنده بیری
نه ایتم غایب اولام کوی علی اکبردن
باشلورام من بوسوزی مژدهٔ الهامی ولی
ایستورم لعل سخنگوی علی اکبردن
ایشیدوب گرچه هامی حُسنینون اوصافیندن
قدّ سرو و خَمِ ابروی علی اکبردن
نه وجاهت نه لطافت نه ملاحت نه ادب
آقالیق نوری یاغور روی علی اکبردن
باخسا یوز یوسف او زهرا بَیَنَن گوزلرینه
مست اولار نرگس جادوی علی اکبردن
چکه لرشامه اگرلیلینی یوز یول قاچماز
قولّاری باغلیدی چون موی علی اکبردن
پهلوانلار بیراشاریله دوشرتپراقه
خوار اولار قدرت بازوی علی اکبردن
- پنج شنبه
- 5
- فروردین
- 1400
- ساعت
- 15:34
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه