ای حسینین دوغرانان قربانی، اکبر آچ گوزون
سالما گوزد‌ن بینوا لیلانی، اکبر آچ گوزون
عمروم اولسا هر قَدَ‌ر من آغلارام صبح ومسا
لیلینی بیر درده سالدون ای شبیه مصطفا
درد جسمانی دگول تاپسین طبابَتلن شفا
بیر طبیب ایستر اولا روحانی، اکبر آچ گوزون
پایین پایونده اگلشدیم من ای نورسته گول
چون حیا مانعدی باشون اوسته گچسم خوش دگول
لاعلاجم سویله لیلا باشینه توکسون نه کول
گورمر‌م اول صورت تابانی، اکبر آچ گوزون
حقّی واردور لیلینون گوزد‌ن توکه خون جگر
من سنی میدانه بو نوعی یولا سالدیم مگر
باشون اوسته آچماسیدی باشینی عمّه ون اگر
زلفیمله پاک ائد‌ردیم قانی ، اکبر آچ گوزون
ای جمال عالم آراسی اولان شمع ارم
یارووه قان پرده چکمیش قویمیور حدّین بیلم
بیر عبادور رؤیتاً قرمز وجودون گورمر‌م
گیزلدوبدور دوغرانان اعضانی ، اکبر آچ گوزون
ثبت ائد‌ر (انور) سنون درد و ملالون دفتره
توشه تا اخذ ائیلسین دار فناد‌ن محشره
زائر اولسون ایستیَر بیرده مزار انوره
اوردادور چون دردینون درمانی، اکبر آچ گوزون
- پنج شنبه
- 5
- فروردین
- 1400
- ساعت
- 15:45
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه