قائم آلِ عباسن آقا قربانون اولوم
چاره‌سیز‌درده دواسن٬آقا قربانون اولوم
سَحَری سُفرووی جبریلِ امین هاردا سالوب؟
ساکنِ هانسی سَراسن؟ آقا قربانون اولوم
کربلانی گزوسن یاکه بقیع زائریسن؟
هاردا مشغول بُکاسن؟ آقا قربانون اولوم
سن‌شب‌ِجمعه‌نی آخرنجه صبح ایلیوسن؟
غملیسن٬ غرقِ نواسن آقا قربانون اولوم
گون‌چیخینجا یوخی‌گَلمز نگران گوزلرووه
صبحه‌جک٬ غرقِ دعاسن‌آقا قربانون اولوم
ای بیزیم‌صاحبیمیز٬ گَل‌داخی‌قان اولدی‌اورَک
عالَمه قبله نماسن آقا قربانون اولوم
اِنس و جِنّ وملکوتین گوزی یولّاردا قالوب
منجیِ ارض و سَماسن٬ آقا قربانون اولوم
قاپوین سائلیدور٬ پیر و جوان٬ شاه و گدا
سن امیرالاُمَراسن٬ آقا قربانون اولوم
کیم دوتا دامنووی صدقیله٬ تز مَطْلَب آلار
هامی امراضه شفاسن آقا قربانون اولوم
فیضِ اَکمَلدی آدون٬(فیضی)نه یازسون٬نه دئسون؟
شعریمه شور وصفاسن٬ آقا قربانون اولوم
- پنج شنبه
- 5
- فروردین
- 1400
- ساعت
- 16:15
- نوشته شده توسط
- یوسف اکبری
ارسال دیدگاه