حسینون قلبینه ناگه مناسینده صفا گلدی
مقام قدسیدن گویا بونوعیلن صدا گلدی
حسین سن کوی عشقونده نگاره تشنه قربان سان
واروندور دعوتون شخصاً منه شایسته مهمان سان
صفای قتلگاهوندن گلوب دیداره حوریلر
جنانی نیلیور حورا اوزون فردوس و رضوان سان
سوسوزلق داشینی باشوندن آت قوی چوللره آخسون
بهشتیمده سنی آب طهوریم گوزلر عطشان سان
اگر عشّاقه اولسام ممتحن بیرده یقینیم دور
ویروبسن امتحان عشقوی سن مرد میدان سان
یمینیم اختیارونده یساریم اختیارونده
جلالیم اختیارونده زمانونده سلیمان سان
یاراتدیم عالم خلقتدّه من مردان خوش سیرت
دیوبلر روز ازلده حسین جان فخر خوبان سان
دیدی پیغمبر خاتم حسین فُلک نجاتیمدور
چکوبسن ساحله دین زورقین منجّی طوفان سان
ایلیکی شیعه نی ایتدون دعا راز و نیازونده
عنایت شیعیه ایتدیم نیه حالی پریشان سان
قزل قانیله قرآنی حسین شیرازه بند ایتدون
کلام اللّهه ناطق سن یوز اون دورت سوره قرآن سان
باخوب طورونده موسانون سیاقینده منی گزمه
سنون قلبوندیم علت ندور جان اوسته حیران سان
اطبّا عشق شهرینده گلر درمان آلار سندن
طبیب عشق کامل سن تمام درده درمان سان
سالا سایه هواده یوللّادیم روح الامین گلدی
نظیرون یوخدی السّاعه حسین آزاده انسان سان
خوشا احوالینه هر کیم یولووا پیروی اولسا
سنه اهل یقین مؤمن اولار تندیس ایمان سان
یوزووی تپراقا قویما یوزوون یاره سی واردور
سنون سبحانه ربوندن خوشام محبوب جانان سان
کسلّر باشوی دالدان وورالّار نیزیه اعدا
اولار پیراهنون غارت گورلّلر یرده عریان سان
«معزی»شعریلر کی نظمه چکدون یاد یار ایلر
سنه لطف خدا شامل اولوبدور افتخار ایلر
- پنج شنبه
- 5
- فروردین
- 1400
- ساعت
- 17:4
- نوشته شده توسط
- یوسف اکبری
- شاعر:
-
استاد یوسف معزی اردبیلی
ارسال دیدگاه