علی او زلفیله دام بلانی نیلورسن
سنون هلالی قاشون وار کمانی نیلورسن
نه باعث اولدی مگر ترک آشیان قیلدون
لباس جنگی گیوب بوینوا کفن سالدون
آتون امام حسیندن دعای خیر آلدون
وداع ائدوب باجیوی عمّه‌لردن آیریلدون
جوان‌اوغول دئ گوروم بس‌آنانی نیلورسن
دومان دوتوب اورگیم پرده پرده شان‌شاندور
سنون منیم اورگیم آهه تیره باراندور
یارالانوب بئله که قلبیمیز پریشاندور
سنونده من‌کیمی قلبون‌دولی‌قزل قاندور
دوباره تیغ جفادن یارانی نیلورسن
گورنده کاکلیوی گوگده قوشلار آغلارلار
کشیده قاشلارون اوسته قلجلار آغلارلار
دالونجا زلفی یولوب قاره ساچلار آغلارلار
هوا یوزینده بولوط یئرده داشلار آغلارلار
آناندان آرتوخ علی آغلیانی نیلورسن
بویان طرفده وزیریله پادشاه آغلار
اویان طرفده باخار حالیوه سپاه آغلار
طناب خیمه ائدر ناله خیمه گاه آغلار
عم اوغلوآ بزنن تازه حجله گاه آغلار
سنون چوخ آغلیانون وار نوانی نیلورسن
اوزون بیلورسن علی نه آنام نه باجیم وار
اوغول آناسی سنون تک باشیمدا تاجیم وار
ئولن زمان سنه دفنیمده احتیاجیم وار
بو گئتمگه نه دیوم الده نه علاجیم وار
گئدورسن ایندی بو بی اقربانی نیلورسن
- پنج شنبه
- 5
- فروردین
- 1400
- ساعت
- 17:6
- نوشته شده توسط
- یوسف اکبری
- شاعر:
-
حاج عباسقلی یحیوی
ارسال دیدگاه