گلشنده صفا یوخدی گلستانه نه گلدی
مرغان غزلخوان خوش الحانه نه گلدی
افسوس که ماتمکدیه دوندی گلستان
گللر سارالوب همّت بارانه نه گلدی
تاجُ الشُّعَرا منزوی انور هارا گیتدی
عاصم کیمی بیر پیر سخندانه نه گلدی
کفران ائلدوک نعمته چیخدی الیمیزدن
اوندان دئدوک اوُل نعمت اَلوانه نه گلدی
بیز اوخشاما یازدوخ اوخودوخ آغلادی ملّت
بیریول دئمدوک مکتب عرفانه نه گلدی
انکار ائلدوک کشور عرفانین امیرین
میدان وئریلیب سائله سلطانه نه گلدی
شاهی کیمی استادین عیان اولمادی قدری
حیرتدییم انصاف مسلمانه نه گلدی
وجداندان ائشیتدیم که صراحتله دییَردی
دین و شرف و عزّت و ایمانه نه گلدی
بیلمزدیم هئچ انسان نچه یوز رنگه دوشرمیش
غیرت دامارین سیر ائلین قانه نه گلدی
بش گونلوک اولان لذّته٬ تن ذلّته ویردی؟
(موسی) گوره سن غیرت انسانه نه گلدی
الان اوجادور نام حسین سقف سمادن
عبرت ایله گور زادهٔ سفیانه نه گلدی
- شنبه
- 7
- فروردین
- 1400
- ساعت
- 12:29
- نوشته شده توسط
- یوسف اکبری
- شاعر:
-
موسی آقایی اردبیلی
ارسال دیدگاه