(مناسب برای سینه زنی خیابانی)
الله الله نیه فریاده بو عالم گلوری
وای اوغول وای سسی عالمده دمادم گلوری
یر اولوب بزم عزا - گوی اولوب غرق نوا
ایله بول گلشنه یاز فصلی اسوب صر‌صر دِی
قدسیان جمله نوا ایلوری بو غمده چو نِی
مرغ طبعیم دله گلدی دیدی گیت قاره‌وی گِی
سال عزا شالیوی ایام محرم گلوری
بویانوب گَرد عزایه گنه‌ده مهر و فلک
وای حسین وای سسی دور بیله گلور تیترور اور‌ک
نه بشر بلکه گیوب رختِ عزا جنّ و ملک
شیونه اهل جناندور که دمادم گلوری
حضرت فاطمه معناده آچوبدور باشینی
مرتضی جاری ایدور عارضینه‌گوز یاشینی
مجتبا اوخشوری اللرده ئولن قارداشینی
مصطفی سینه وورور یاسه مسلّم گلوری
انبیالر باش آچور فاطمه‌نین وای سسینه
گوی تزلزل ایلیور ناله‌ی ایوای سسینه
آغلاشور کورپه اوشاقلار علی لایلای سسینه
سس ربابین سسینه عرشیدن هر دم گلوری
نوح اوخور نوحه وورور سینه ایدور آه و فغان
خضر و الیاس و مسیحا باش آچوب آغلوری قان
تاجینی آلمیش اله روح‌الامین ناله کنان
بو عزا بزمینه حوا ئیله آدم گلوری
دل بو ایام محرمده دوشور تاب و تبه
کربلا دشتی چکور صیحه - امیر عربه
آغلاشور اول سو کنارینده ئولن تشنه لبه
شیعه‌نین صبری داشوب سینه سینه غم گلوری
الله الله نیه بس اولمادی ویران بو کرات
اوندا کی قانینه غرق اولدی حسین فُلک نجات
عرشیدن گلدی بو سس که دونسن قانه فرات
نهر علقم آخوری نالیه هر‌دم - گلوری
نیه بس اوندا که شمر ایله‌دی ظلمون علنی
ایستدی ئولدوره ناحق - پسر فاطمه‌نی
بیر نفر اولمادی شمره دیسون ای شوم دنی
ظالم ئولدورمه بونی لرزیه عالم گلوری
قوی یره خنجریوی خالق یکتادن اوتان
باباسی حضرت طاها شه بطحادن اوتان
چیخما بیله سینه‌سی اوستونه زهرادن اوتان
آناسی اوغلونا ایندی دوتا ماتم - گلوری
یوخ مگر کیمسه‌سی گلسین اورگین داغلاماقا
باشی اوسته بو غریبون باش آچوب آغلاماقا
گیت کناره باجیسی گلدی گوزون باغلاماقا
خیمدن مقتله زینبدی - مسلّم گلوری
یا حسین "اکرمیم" گور منیم آغلار گوزومی
گرچه نالایقم ای شاه قبول ایت سوزومی
قسمت ایت منده قویوم قبریوین اوسته یوزومی
نار حسرتده یانوب درده بو سینم‌گلوری
- سه شنبه
- 10
- فروردین
- 1400
- ساعت
- 11:48
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه