شبه پیغمبر اوغول وای
مظهر حیدر اوغول وای
توپراقا قویما یوزون - ایوای علی‌اکبر
بیرده آچ قانلی گوزون - ایوای علی‌اکبر
ای منیم شهزاده اوغلوم
گلمیشم امداده اوغلوم
دور گیداخ مخیمده قیزلار
گلمسون فریاده اوغلوم
حالیوه چوخدور یانان - ایوای علی‌اکبر
سسلنر لیلا آنان - ایوای علی‌اکبر
باشیوی دیز اوسته آلدیم
گُل کیمی سولدوم سارالدیم
سن اوغول مقصوده چاتدون
من ولی غمدن قوجالدیم
گیتدی الدن طاقتیم - ایوای علی‌اکبر
دلده آرتوب محنتیم - ایوای علی‌اکبر
بیله قانلی پیکر اولماز
بیله خندان گوللر اولماز
دوغرانوبدور گل وجودون
گل سنون تک پرپر اولماز
بس ندن گلمور سسون - ایوای علی‌اکبر
آل سسین من بی‌کسون - ایوای علی‌اکبر
فخر آل‌هاشم اوغلوم
قان اولوب گوز یاشیم اوغلوم
سن شهید اولدون اوجالدی
دین یولوندا باشیم اوغلوم
جدّیمه بنزر اوغول - ایوای علی‌اکبر
دینینه یاور اوغول - ایوای علی‌اکبر
سنسیز ای روح و روانیم
بیر کسه گلمز گمانیم
خیمه‌گاهه یوخ دیزیمده
گیتماقا تاب و توانیم
اولین قربان دین - ایوای علی‌اکبر
قالمیشام من بی‌معین - ایوای علی‌اکبر
ای حسینون غمگساری
لیلینون صبر و قراری
اول قدر یاره ووروبلار
جسمیوه یوخدی شماری
تیر غم قلبیم بُلور - ایوای علی‌اکبر
آغلورام دشمن گولور - ایوای علی‌اکبر
سن گل باغ وفاسن
آیت حُسن خداسن
من خلیل‌الله عشقم
سن ذبیح کربلاسن
سسلورم هر آن سنی - ایوای علی‌اکبر
آتموسان گوزدن منی - ایوای علی‌اکبر
گیت سنی جدّون پیمبر
گوزلور الده آب کوثر
من غریبی گوزلور امّا
شمر الینده قانلی خنجر
آغلورام دلدن سنه - ایوای علی‌اکبر
ال چالور اعدا منه - ایوای علی‌اکبر
نه سولار بیر بیله باغلار
نه آلار چم بیله داغلار
دور گیداخ قویما آناوی
خیمه‌لرده قالسون آغلار
دوغرانوبسان سر‌به‌سر - ایوای علی‌اکبر
قالدی لیلا دیده تر - ایوای علی‌اکبر
"اکرمی" ایستر شفاعت
یا حسین ای کان رحمت
ئولممیش پائین پانی
ایله بو جمعه عنایت
جامه‌ی ماتم گیاخ - ایوای علی‌اکبر
سس قُشون باهم دیاخ - ایوای علی‌اکبر
- سه شنبه
- 10
- فروردین
- 1400
- ساعت
- 12:4
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه