یاتما قوملار اوستونده نازیله
آچ گوزون اویان نوجوان اوغول
دور گیداخ خیامه یارالیسان
گوزلوری یولووی آنان اوغول
جام عمرووی اشقیا چالوب
ای شبیه ختم رُسُل داشا
کربلایه اسدی خزان یلی
عمروون بهاری یتوب باشا
خیمه‌لرده ایندی آنان سنون
جام صبری غمدن داشا داشا
گوزلری یولندا قالوب ایدور
فرقتونده آه و فغان - اوغول
سندن ای وفالی اوغول نه تز
ظلمیله اوزولدی الیم منیم
دوندی گوز یاشیم قانه، آتشِ
غمده یاندی جان و دلیم منیم
مصطفی باخیش مصطفی یریش
دور ایاقه سندی بلیم منیم
ای الیم عصاسی نه یاتموسان
اولدی قامتیم چون کمان اوغول
قلب کون و امکانه آهیوین
آتشی شراره سالان زمان
بولدوم اشقیا دور‌ه‌وی آلوب
خیمده سسیوی آلان زمان
قیزلاریم نه احواله قالدیلار
اللریم بلیمده قالان زمان
قالمادی دوزوم تیتردی دیزیم
قان اولوبدی قلبیم اینان اوغول
گول وجودیوین دوره‌سین آلوب
تیر و نیزه‌لر مثل خار و خس
الدن اختیار و توان گیدور
سینده شماره دوشور نفس
قانیله دولان گوزلریوی آچ
بیرده دور منیم ویر سسیمه سس
بلکه جسم بی‌جانیمه منیم
تازه‌دن گله بیرده جان اوغول
باشیوین باخاندا یاراسینا
یادیمه دوشور مهربان آتام
بو محنده گوز یاشیمی اوغول
ایستیرم اورک قانینه قاتام
تا سنیله بیر یوزیوزه قویام
منده سن کیمی قانیمه باتام
جانیوه قسم سنسیز ایستمز
جنّت و بهشتی آتان اوغول
بند بند اولوب پیکرون ز بس
اشقیا ووروب نیزه و سنان
گول کیمی آچوبدور یارالارون قان
سو تک اولوب چوللره روان
بیله گلستانه فدا اولا - کاش
بو کمکسیز غریب آتان
هانسی بیر گلستانلارین آچوب
گوللری بیله ارغوان اوغول
فرقتونده ای نوجوان اوغول
دوندی‌گوندوزوم‌شامه‌دور گیداخ
باشیمی بو صحراده سالما چوخ
محنتیله آلامه دور گیداخ
ناگران آنان باغریقان باجون
منتظردی اخیامه دور گیداخ
ایلمه بو صد پاره جسمیله
ایستی قوملار اوستون مکان اوغول
"اکرمی" سنون یاد ایدر غمون
عارضه توکر اشگ برملا
هانسی یرده گورسه آدون گلور
اوردا ساخلیوبلار سنه عزا
گوز یاشی توکوب بیله ورد ایدر-
ایسته قبریوه نوکرون آقا
چون که قبریوین حسرتین چکر
هر زمان او دل داغلیان اوغول
- سه شنبه
- 10
- فروردین
- 1400
- ساعت
- 12:8
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه