خوش گلوبسن دئدى راهب، بو كليسايه حسين!
دولانوم باشيوه سالدون باشيما سايه حسين!
بو گئجه صبحه كيمى یوخلامارام آغلیارام
چوخلى دينار و درم وئرميشم اعدايه حسين!
بو قرانلوق يئرى نورونله ايشيقلانديردون
وئرمرم بو يئرى مین جنّت الاعلايه حسين!
كسيلوبدور باشون امّا گنه ده ذكر دیور
اوخويور گاهى بو قانلى دوداقون آيه حسين
بلَشوب هاردا یوزون قانه، کوله؟ کول باشیما
بنزيور قانلى یوزون بیر دوتولان آيه حسين!
باشيوى شمر كسوب بس نيه آلنون يارادى؟
كيم جفا داشینى وُردى بئله سيمايه حسين!
بو نئجه باشدى دوشوب الدن اله دُرّ کیمی؟
بو باشين بير توكى باشدى ايكى دنيايه حسين!
بوغازون قانى بو داشی ائلیوب لالیه تای
دوداقون قانلىدى اوخشار گل حمرايه حسين!
گلوب عيسى بو گئجه اللرى قوينوندا بورا
اولا هم ناله اودا حضرت طاهايه حسين!
گئينوب قاره گلوب مريم عذرا بو يئره
تسليت عرض ائليه محضر زهرايه حسين!
دينمى ترك ائدورم منده مسلمان اولورام
داخى تابع دگولم دين مسيحايه حسين!
بورا بير گون گله جك شيعهلرون آغلاماقا
آغلياركيم گله بو غصّهلى مأوايه حسين!
گلدى گؤزياشلى زيارت ائليه بيرده «بشير»
دامجی دور نسبتى واردور ولى دريايه حسين!
اونا سن ايله عطا كرب وبلا تذكره سين
وئرورى آند باجون زينب كبرايه حسين
- یکشنبه
- 15
- فروردین
- 1400
- ساعت
- 20:28
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه