دنيا بيزه هدف دگول امّا وسيله دی
عقبانين اهلينه بلی دنيا وسيله دی
مردم بو تايدان اُول تايا ايستور کئچيب گئده
لطف خدا و کشتی و دريا وسيله دی
هر عاشق ايستيور چاتا معشوق اصلیيه
مجنونه بو طريقيده ليلا وسيله دی
آللّهی گؤرمک ايستيوسن باخ طبيعته
موسایِ عشقه وادی سينا وسيله دی
هر کيمسه ايستسه اؤخويا معرفت خطين
درس ادبده مشق الفبا وسيله دی
تنها او لامکانه دوتور يوز هامی بشر
يوخسا کُنشت و دِير و کليسا وسيله دی
خئيره گر الله ايستسه، دشمن سبب اولار
بعضی زماندا اؤغرودا حتّی وسيله دی
گؤر هاردا يوسفی ائليور آلله امتحان
بو امتحاندا قصر و زليخا وسيله دی
طبّ عالَمی گؤزلدی، مريض و مريضيه
آلله وئرور شفانی اطبّا وسيله دی
خلاّقين اؤز الينده دی مخلوقی ئولدورور
هردن ديريتماقا دمِ عيسی وسيله دی
هر لذّت و عذاب، بو روحين باشيندادی
هر زادی روح درک ائدور اعضا وسيله دی
پيغمبر امّتی قوتولا گير و داريدن
محشر گؤنی شفاعت زهرا وسيله دی
عبّاسين اللرين الی اوستونده ساخليار
سؤيلر شفاعت ائتماقا تنها وسيله دی
سيمرغ عشق تک چاتا قاف سعادته
(سيدبشيره) عِلميله تقوا وسيله دی
- یکشنبه
- 15
- فروردین
- 1400
- ساعت
- 20:52
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه