گؤزلسن، اوخشادورام گؤیده آفتابه سنی
گؤزل تاری نه گؤزل پای وئروب ربابه سنی
بو گول جمالیوه هرکیم باخور دیور صلوات
چون اوخشادور چمن ایچره گوله گلابه سنی
اوشاقدا بیر بئله شیرین اولار آنایه مگر؟
مثَل ویروم سنه شهدی یا شهدِ نابه سنی؟
آتان آتاسینی چوخ ایستیور، اودور آدیوی
قویوب «علی» آداش ایلوب ابوترابه سنی
باخیشدان اوخشویوسان چوخ، عمون ابوالفضله
گوروم کی گورمه سین آلله چوخ اُول جنابه سنی
سکینه هامّودان آرتیق سنه گؤره سؤینیر
ایکی قولون قاب ائدرکن سالور او، قابه سنی
سنی قوجاقه آلانمام بی بون اولان یئرده
گلنده او، قویارام فوری رختخوابه سنی
کتاب عشقیده یئتمیش ایکی گؤزل آد وار
الست سؤیگولی، امضاء ائدوب کتابه سنی
دیولّه کرب وبلاده منیم یانار اوره ییم
سوسوزلوقون اؤدی چون دؤندرر کبابه سنی
او باغبانم اوغول آلتی آی، اوزوم گولتک
گؤز اوسته بسلیرم قانلی انقلابه سنی
او قدری حُسنوی بیر گون سالار خیاله «بشیر»
غزل یازاندا سالار حُسن انتخابه سنی
- دوشنبه
- 16
- فروردین
- 1400
- ساعت
- 17:49
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه