آچ گوزيوى دمبدم دلبر و دلداره باخ
غار حرادن گلن احمد مختاره باخ
ساقى ميخانه! وئر جام مىِ شوق و شور
گلدى مسلمانلارا موسم وجد و سرور
شادلیق ائدور عدنيده عشقيله حور و قصور
شمس رسالت ائدوب غار حرادن ظهور
گؤر نه منوّر اولوب طور كيمين كوه نور
شعشعهى نوره باخ معدن الانواره باخ
غار حرادن گلن احمد مختاره باخ
وَقريلى داغلار كيمين داغدان او سرور گلور
باشه قويوب تاج عشق عاشق داور گلور
آللَّه آدين وِرد ائدوب ديلده او دلبر گلور
عالم عَرَضدور بلى عالمه جوهر گلور
عازم اولوب منزله سارى پيمبر گلور
لعل شكرباره باخ ديلدهكى اذكاره باخ
غار حرادن گلن احمد مختاره باخ
تاج نبوّت قويوب باشينه حىّ اَنام
باشدان اياقه اولوب نور او شه ذوالكرام
محو تماشا اولوب جنّ و بشر بالتّمام
يولدا آغاجلار اگور باشين ائدور احترام
حضرت پيغمبره عرض ائليوللر سلام
ساقى اطهاره باخ ساغر سرشاره باخ
غار حراده گلن احمد مختاره باخ
خسرو بطحايه باخ يار دلآرايه باخ
نور تجلاّيه باخ آى كيمى سيمايه باخ
قامت رعنايه باخ رتبهى والايه باخ
شافع عقبايه باخ حضرت طاهايه باخ
مُصحف عيسايه باخ فارقليطايه باخ
دُرج لبيمدن چیخان اُول دُر شهواره باخ
غار حرادن گلن احمد مختاره باخ
امّت پيغمبره من درجات ايستورم
حشريده آللّهيدن راه نجات ايستورم
كعبه سينى گؤرمگه برگ برات ايستورم
چشمه سينه تشنهام آب حيات ايستورم
سندن او يار عشقينه بير صلوات ايستورم
زلف چليپايه باخ آى كيمى رخساره باخ
غار حرادن گلن احمد مختاره باخ
يار مؤيّدى بو، سرور امجددى بو
شاه دو عالم ولى، بندهى ايزددى بو
منجى كلّ بشر، حق كيمى سرمددى بو
گؤيده ملكلر ديور بيربيره احمددى بو
يئرده ديوللر نبى يعنى محمّددى بو
صاحب قرآندى بو مَحرم اسراره باخ
غار حرادن گلن احمد مختاره باخ
يولدا علينى گؤروب سؤيلدى: اى جان منه!
گؤر نئجه لطف ايليوب حضرت جانان منه
يولاّدى جِبريلدن آيهى قرآن منه
حكم رسالت وئروب خالق سبحان منه
ايندى على جان گئتور قلبيدن ايمان منه
گؤر نه دئدى مرتضی ديلدهكى اقراره باخ
غار حرادن گلن احمد مختاره باخ
عرض ائلدى يا نبى! حقّ ائدوب احسان سنه
اولموشام اؤن ايلدى من واله و حيران سنه
اؤندا كى قنداقهمى وئرديله مهمان سنه
گَئتديم آچیلجاق گؤزوم قلبيدن ايمان سنه
جانِ دو عالم اولا يكسره قربان سنه
عاشقه باخ عشقه باخ حيدر كرّاره باخ
غار حرادن گلن احمد مختاره باخ
گون آيى آغوشينه، آلدى دئدى مرحبا
ياور و ياريم على، شيرخدا، مرتضا!
دهريده سن سن اولان صاحب تخت هُدا
حشريده سن سن اولان صاحب حوض و لوا
من فَتَدلّى شهى، سن شه ملك ولا
حجّت داداره باخ، سؤيملى رفتاره باخ
غار حرادن گلن احمد مختاره باخ
ماه رجبده اولوب حق طرفيندن امير
شافع روز جزا، عالِم سرّ ضمير
چوخ گؤزل القابى وار بيرده بشير و نذير
حشره كيمين دهريده معجزهسى بی نظير
فخر ائله صبح و مساء جدّيوه «سيّدبشير»
قطره يه باخ بحره باخ نسبته باخ ياره باخ
غار حرادن گلن احمد مختاره باخ
- دوشنبه
- 16
- فروردین
- 1400
- ساعت
- 17:59
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه