صحابیِّ پیمبر، حبیب بن مظاهر
حسینه قوجا نوکر، حبیب بن مظاهر
قیزیل قانه باتوبدی
بویوک شأنه چاتوبدی
دییردی اونا سرّین علی شاه ولایت
اودا شیرخدادن ائدردی چوخ حمایت
دئدی حقّ علی نی اودور تاپدی سعادت
اولوب یاور حیدر، حبیب بن مظاهر
اونا کوفه ده بیرگون دئدی میثم تمّار
حسینه گوره بیرگون باتار قانه بو رُخسار
کسیک باشیوی دشمن ائدر زیبِ سرِ دار
بویوردی بونی ایستر، حبیب بن مظاهر
گئجه یاری چیخوبدی اوگیزلنجه وطندن
گلوب کرب وبلایه کئچه جانیله تندن
رهِ حقده حمایت ائده شاهِ زمندن
گوروب تکدی او سرور، حبیب بن مظاهر
آلوب اذنِ جهادین او سرباز توانا
صلابتله دیوردی منم فارِسِ هیجا
وفادارم حسینه بو مَنهَج ده شکیبا
ائدر جنگِ مکرّر، حبیب بن مظاهر
او آغ سقّلی آخر قیزیل قانه باتوبدی
شهید اولدی اودورکی بویوک شأنه چاتوبدی
یارالی بدنیله مزارینده یاتوبدی
اولوب گول کیمی پرپر، حبیب بن مظاهر
مزارین ایکی دفعه زیارت ائلیوللر
بو نوعیله حبیبه محبّت ائلیوللر
حسینه گؤره عرضِ ارادت ائلیوللر
یاتوب قبریده مضطر، حبیب بن مظاهر
حبیب قانه باتاندا جوانان دئدی ای وای
اونا آغلادی شاهِ لب عطشان دئدی ای وای
یارالی بدنیله شهیدان دئدی ای وای
گئدوب جنّته آخر، حبیب بن مظاهر
حبیب اولدی حسین تک عزیز قربانا قربان
کئچوب باش و جانیندان اولوب قرآنا قربان
«بشیر»ین جانی اولسون قوجادربانا قربان
آدی دیل لره ازبر، حبیب بن مظاهر
- سه شنبه
- 17
- فروردین
- 1400
- ساعت
- 19:16
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه