وار یئری حسین جان! – دؤنسه قانه اشکیم
آغلیور او تشنه لب لره سو مشکیم
اللریم دوشوب تندن
چوخ خجالتم سندن
گل هرایه قارداش، گل هرایه قارداش
من سنی چاغورّام – دام اهرِمنده
زینبی چاغیر سن – خیمه دن گلنده
تا کمک لیق ائتسین - مرکبه میننده
تلّه جاق یولا سالسین
اوردا منتظر قالسین
گل هرایه قارداش، گل هرایه قارداش
دویمادیم سنون تک – تشنه قارداشیمدان
من سنون یولوندا – کئچمیشم باشیمدان
خِجلتیم عیاندی – قانلی گؤزیاشیمدان
قارداش! اوخلانوب مشکیم
سو کیمی آخور اشکیم
گل هرایه قارداش، گل هرایه قارداش
نهرِ علقم اوسته – دوشموشم یارالی
گَل داغیت غضبله – لشکرِ ضَلالی
سالماسینلا دیلدن - یاره¬لی غزالی
چوخ چتین زماندور گل
السیزم آماندور گل
گل هرایه قارداش، گل هرایه قارداش
گل عنایت ائت بو – مطلبه حسین جان!
زینت اولدی قانیم – مذهبه حسین جان!
پرچمیمی تاپشور – زینبه حسین جان!
تا اولا علمدارون
چون اودور هوادارون
گل هرایه قارداش، گل هرایه قارداش
لطف ائله «بشیر»ین – حاجتین روا ائت
قلبینی همیشه - عشقه مبتلا ائت
هر نه دردی اولسا – سن اوزون دوا ائت
چون قاپوندا ذاکردی
دلشکسته شاعردی
گل هرایه قارداش، گل هرایه قارداش
- چهارشنبه
- 18
- فروردین
- 1400
- ساعت
- 18:42
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه