ای دل ای دل حمد ائله یزدانه تاسوعا گونی
مُنتسبدور ساقی عطشانه تاسوعا گونی
ای حسینچی دیده ی خونباریوه قربان اولوم
عشقیله اُول سینه ی سرشاریوه قربان اولوم
سینه وور سینه ووران قولاّریوه قربان اولوم
حق دئ تا قلبون اولا حق خانه تاسوعا گونی
ای سالان یاده سوسوز سقانی سسلن یاحسین
هر نقدری وار سنه امکانی سسلن یاحسین
کس ابوالفضل عشقینه قربانی سسلن یاحسین
کسمه میش باشین سو وئر قربانه تاسوعا گونی
عالی بیر عزت وئروب جانان ابوالفضل آدینه
عقل لر حیران قالوب حیران اوبوالفضل آدینه
گور نقدری ذبح اولور قربان ابوالفضل آدینه
باخ سو تک جاری اولان القانه تاسوعا گونی
ای کسن قربانی قربانون گوروم اولسون قبول
آلله اوغلی اولمیانلاره بوگون وئرسین اوغول
زاده ی ام البنینه گور نه واله دور عقول
ایلیور عاقل لری دیوانه تاسوعا گونی
آند اولا کربلا دشتینده آخمیش قانلارا
آند اولا دریا یانیندا جان وئرن عطشانلارا
باقدوقیجا دسته دسته ذبح اولان قربانلارا
آغلاروق یئتمیش ایکی قربانه تاسوعا گونی
بیز حسین عشاقیوق هر آن حسینه آغلاروق
ذبح اولاندا دستیه قربان حسینه آغلاروق
سو وئرنده قربانا عطشان حسینه آغلاروق
ایلروق ناله سوسوز سلطانه تاسوعا گونی
بیز خداوند تعالی دن اطاعت ایلروق
بیز رسول اکرمه عرض ارادت ایلروق
بیز ولایتدن امامتدن حمایت ایلروق
ای جهان اهلی باخون ایرانه تاسوعا گونی
لوءلوء و الماسین آدینده نه لر وار بیلمورم
یار با احساسین آدینده نه لر وار بیلمورم
حضرت عباسین آدینده نه لر وار بیاموزم
ایلیور عاقل لری دیوانه تاسوعا گونی
خوشدی ای دل دم به دم آل علی دن دم ووراق
کعبه و بیت المقدسده قرا پرچم ووراق
دسته دسته گلمیشوق تا سیلی محکم ووراق
داعش بی دین و بی ایمانه تاسوعا گونی
آند اولا آل علی نین قان اولان گوزیاشینه
آند اولا کرب و بلا سلطانی نین قارداشینه
کعبه تک دوءنّوق دولانّوق قاره پرچم باشینه
شمع عشقه اولموشوق پروانه تاسوعا گونی
- چهارشنبه
- 18
- فروردین
- 1400
- ساعت
- 18:51
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه