بو گئجه يافاطمه! ناله و افغانه گل
ترك ائليوب جنّتي، شام غريبانه گل
فاطمه يافاطمه
فاطمه يافاطمه
اوغلون حسين بو گئجه، خوليه مهمان اولوب
كول لرين اوسته قويوب، باشيني پنهان اولوب
مطبخه باخ گؤر نئجه، نور و چراغان اولوب
گؤرماقا جانانيوي منزل دونانه گل
ساخلا حسينه گهي، خولي ائوينده عزا
گاهي يانان خيمه ده، ائتگلين آه و نوا
گه، يولووي سالگیلان، قتلگهه برملا
بزم عزا قورماقا واديِ اَحزانه گل
يئتميش ايكي شمعِ عشق، سؤندي جهان تار اولوب
نصفي يانان خيمه ده، زينب عزادار اولوب
قاره سالوب باشينه، بي كس و بي يار اولوب
اُول قيزيوي گؤرماقا قانلي بيابانه گل
شيعه لرين غصّه دن، ديل لري شان شان اولوب
كرب وبلا جؤريله، يكسره ويران اولوب
زينبووين ال لري، دوغرانوب القان اولوب
قوي اليوي قوينُوا قلبي يانايانه گل
ارض و سماني دوتوب، غصّه و غم يكسره
زينبه باخ زينبه، زينت اولوب حيدره
اُول داغيلان قيزلاري، جمع ائليوب بير يئره
شام غريبان دوتوب شاه شهيدانه، گل
زينب اسير اولماقي، ذرّيده امضا ائدوب
عُمر، بويي عشقيلن، نقشي ني ايفا ائدوب
قارداشي نين نهضتين، دهريده احيا ائدوب
حيف اولا دؤندي اوجا قامتي چوگانه، گل
چؤلده حسين عترتي، جمله وطن سيز قالوب
پيكر صدپاره سي، عور و كفن سيز قالوب
غمزده بلبل لري، باغ و چمن سيز قالوب
گول لري پرپر اولان باغ و گلستانه گل
صاحب عزادور، اؤزي بو گئجه صاحب زمان
آغلياجاقدور يقين، بو سؤزه اُول باغري قان
كسدي حسينون گؤزل، ال لريني ساربان
سؤيله «بشير»ا آنا! بو شب هجرانه گل
- چهارشنبه
- 18
- فروردین
- 1400
- ساعت
- 18:55
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه