یاران! گنه قولاقیمه بانگ اذان گلور
بو کهنه جسمیمه ائله بیل تازه جان گلور
شهر مدینه ده نه خبر واردی بیلمورم
دسته به دسته اُول یئره قدّوسیان گلور
گویا آچوب اوگول کی چوخ اوخشور قیزیل گُوله
بولبول کیمین فرشته اولوب نغمه‌خوان گلور
دنیا گولی دگول، بو گلِ باغ عشق‌دور
عشق اهلینون مشامینه عطر جِنان گلور
آلدیم خبر کی وار نه خبر ای صبا یئلی!؟
هم عطر و هم اذان سنیله توأمان گلور
آهسته سؤیله‌دی منه وئر مشتولوق دئییم
بیلدیم او دم ندندی صبا شادمان گلور
شایسته‌دی بشارتی وئرسین گرَک «بشیر»
چون‌سوزلری آخار سوکیمین چوخ روان گلور
ای شیعه‌لر! دیوم نه خبر وار مدینه‌ده
شادی ائدون، بو مجلسه چون دوستان گلور
آلله، حسینه بیر قیز عطا ایلیوب بیلون
دیدارینه جِناندا اولان حوریان گلور
بعضی ئوپور ایاقلارینی بعضی ال‌لرین
وجد و سروره عشقیله بوسه وُران گلور
فرمایش ایلیوبدی پیمبر کی گول‌دی قیز
گرچه بیر عدّه‌یه قیز اولاندا گران گلور
امّا حسین، حمد و ثنا ائتدی آللّها
چون کی بیلوردی رحمت رحمان عیان گلور
باخدی او غنچه لب‌لرینه باغبان، گولوب
شوقه نچون گورنده گولی باغبان گلور
آدین «رقیّه» قویدی ترقّی ائدوب چو سَرو
رشد ایلدیقجا قامتی چوخ دلستان گلور
قلبون سخیلسا غم یئمه بیر یارقیّه؛ دیء
قلبه رقیّه‌نی چاغوراندا توان گلور
بو باجی‌سین جوان علی اکبر چوخ ایستیور
علّت اودور کی هیئتینه چوخ جوان گلور
ایستولله سؤیله‌سینله رقیّه غلامووک
آللهیدن صورا، سیزه تنها گمان گلور
درگاه عزّ و جاهیوه، امّیدیله «بشیر»
شعرین یازوب الینده دوتوب ارمغان گلور
- جمعه
- 20
- فروردین
- 1400
- ساعت
- 22:37
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه