باخ آتامین دوداقینه قانی رواندور عمه جان
قلبیم اودور که غصه‌لی تیره نشاندور عمه جان
دوزدی که اوچ یاشیندیام، غصه یوروب قوجالمیشام
بار غمیله قامتیم عین کماندور عمه جان
گور نه صفالی بزمدور هامّی یاتوبدی بیز اویاق
قوی من ئولوم سن آغلیوب خلقی اویاندور عمه جان
ساچلاریما داراخ چکن اللریوه اولوم فدا
فکر ائدورم ساچیم کیمی داراخدا قاندور عمه جان
کیم آتامین محاسنین آل قانینا بویاندیروب؟
ساچلاریمیلا قوی سیلیم قانین آماندور عمه جان
ئولسم اگر خرابه ده، کیم قازاجاقدی قبریمی
کیم وئره جاقدی غسلیمی، غملی زماندور عمه جان
قویما ربابی چوخ یانا آتش هجر اصغره
سینه سینه گلوبدی سود، حالی یاماندور عمه جان
من بو قورو خرابه‌نی باغه مبدّل ایلرم
خلق گلوب گوره‌لّه کی مثل جناندور عمه جان
شاعر اودور یازان زمان آهیله اود دوتوب یانا
یانماسا یاندیرانماز او، سرّی عیاندور عمه جان
"شانی"یه اقتدا ائله سوزیله یاز سوزی "بشیر "
یاز که خرابه بو گئجه رشک جناندور عمه جان
- جمعه
- 20
- فروردین
- 1400
- ساعت
- 22:38
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه