آغلا بلبل! گل خندان الیمیزدن گئتدی
زینت صحن گلستان الیمیزدن گئتدی
غنچه لر تازه آچیلمیشدی خزان بیردن اسوب
باغبان ئولدی بهاران الیمیزدن گئتدی
آیریلیق سالدی یامان درده یامان گونده بیزی
دردیمیز قالدی او درمان الیمیزدن گئتدی
یاندی پروانه لرین بال و پری محنتدن
چون سونوب شمع شبستان الیمیزدن گئتدی
یاز بولودلاری کیمی آغلاماق عادتدی بیزه
آغلاروق جانیله، جانان الیمیزدن گئتدی
چوخ ادبلی دی، وفالی دی گوزل یولداشیمیز
دوسلارین ائتدی پریشان الیمیزدن گئتدی
شعرا انجمنینده اوخونور شعر فراق
شاعر شاه شهیدان الیمیزدن گئتدی
بانی هیئت شهزاده علی اصغریدی
خادم عترت و قرآن الیمیزدن گئتدی
نوحه خوانلیق ائلیوب روضه اوخوردی یارالی
تئز اولوب عازم رضوان الیمیزدن گئتدی
شاعر و ذاکر و خادم اولانون حرمتی وار
حیف اولا بیر ائله انسان الیمیزدن گئتدی
بیز بونا آغلیوروق آغلیانون ئولدی، حسین!
روز و شب گوزلری گریان، الیمیزدن گئتدی
یاحسین! یاخشی بیلورسن سنه چوخ سینه ووروب
دائما سینه سی سوزان الیمیزدن گئتدی
سنون عشقونده اونی یاد ائلروق هیئتده
گوز یاشی ایلروق احسان، الیمیزدن گئتدی
تسلیت‌نامه‌دی بو شعرِ "بشیر" ای یاران!
فاتحه ختم ائدون "عمران" الیمیزدن گئتدی (1)
(1) در سوگ مرحوم کربلایی عمران امامی‌نژاد؛ شاعر، ذاکر و خادم اهل بیت علیهم السلام
- جمعه
- 20
- فروردین
- 1400
- ساعت
- 22:56
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه