گئنه دوشدى الهى! ياده عبّاس
علي‌دن درس آلان آزاده عبّاس
يئتيشدى نوبتى ميدانه گئتسين
سو آلسين قيزلارا شهزاده عبّاس
گيوبدى اگنينه جنگى لباسين
او قدّى اوخشيان شمشاده عبّاس
گلوب عرض سلام ائتدى ادبلن
داياندى محضر مولاده عبّاس
اجازه آلجاقين ميندى عقابه
گتوردى زينبى فرياده عبّاس
خلاصه عرصه‌ی جنگاهه چاتدى
چكوب بير نعره اُول مأواده عبّاس
بدن لر تیتردى، سس لر كسيلدى
بويوردى لشکر بيداده عبّاس
اگر سو وئرمَسوز آل رسوله
وئرر كولتك بو قومى باده عبّاس
گلون مقبول ائدون دين مبينى
گلوبدور صحنه‌ی ارشاده عبّاس
كه ناگه چكديلر شمشير و نيزه
اولوب جنگ ائتماقا آماده عبّاس
دئدى اللَّهُ اكبر، چكدى شمشير
قووبدى لشکرى هيجاده عبّاس
دگوبدور بير بيره صف‌لر پوزولدى
گتوردى محشرى ايجاده عبّاس
هره بير سمته قاچدى قورخوسوندان
سالوب طوفان دل اعداده عبّاس
يول آچدى قوش كيمين چاتدى فراته
داياندى داخل درياده عبّاس
سوويلان دولدوروب مشكين او سقّا
سوسوز كيمدور؟ حسين، سقّاده عبّاس
ز بس جنگ ايليوب ايستى هواده
سوسوزموشدى بلى دعواده عبّاس
اودور دولدوردى اووجون بارى ايچسين
آلوبدى بير سس اُول اثناده عبّاس
ائشيتدى سس گلور يانديم عمو گل
سووى توكدى يئره چون باده عبّاس
دئدى سو ايچمسه مولا حسينيم
گرك سو ايچميه دنياده عبّاس
غرض چيخدى سودان لب تشنه سقّا
دوتوب تيغى يد بيضاده عبّاس
بو قصديلن سو مشكين تئز يتورسين
خيامه يوزقويوب شهزاده عبّاس
بئله اولماز دئدى، سعد اوغلى لشکر!
برابردور سيزه ياراده عبّاس
اگر قطع اولماسا قولاّرى تندن
سيزى محو ايلير صحراده عبّاس
دوشوبدور قولاّرى سودايه بير باخ
سو آلدى قول وئريب سوداده عبّاس
او حالدا ساخلادى چوخ زحمتيلن
سو مشكين سينه‌ی سيناده عبّاس
ياغيش‌تك اوخ ياغوردى دورت طرفدن
گوروب ناگه بير اوخ بيناده عبّاس
دگوب اوخ مشكه، سو آخدوقجا ياندى
سراپا قامت رعناده عبّاس
يارالى باشيلن آتدان دوشنده
گوروب زهرانى‌ده معناده عبّاس
بوياندا يئر آچوب آغوشين، امّا
آچوبدور قولاّرين زهراده، عبّاس!
يا گل آغوشيمه يا سسله قارداش
حسينى سسلدى امداده عبّاس
حسين! سن گلميونجه بو منايه
باشين وئرمز كف جلاّده عبّاس
ائشيدجك زينبه اُول شه بويوردى
منى باجى! چاغوردى داده عبّاس
مينوبدور ذوالجناحه گلدى فوراً
گوروب نخجير اولوب صيّاده عبّاس
نه اللّر وار، نه پرچم وار، نه مشكی
داخى قادر دگول هئچ زاده عبّاس
يارالى باشى شه آلدى قوجاقه
دئدى سيندى بئليم دنياده عبّاس
"بشيرين" دوت اليندن اُول زمان كى
اوچارسان جنّت الاعلاده عبّاس!
- جمعه
- 20
- فروردین
- 1400
- ساعت
- 23:1
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه