گوزون دوشنده علینون گوزل غزللرینه
دئنن کی مشتری ام مشتعل غزللرینه
کلامِ وَحییله نهج البلاغه قارداشدی
وضو یوخوندی اگر وورما اَل غزللرینه
حدیثِ زلفِ علی منحصردی فاطمیه
اوزون قصیده سینه گئتمه، گَل غزللرینه
اگر بصیرته سرمشق و منبع آختاروسان
توجه ائت، نه یازوب گور جَمل غزللرینه
یاتوبدی سایۀ هر نقطه سینده مین حکمت
سوز اهلی واله اولوب بی بدل غزللرینه
جهانِ شعر و ادبده دلیلی وار کی اونون،
یتیشمیوب هله ده هئچ غزل غزللرینه
غزل دئیوب شُعرا تاخچیا قویار اما
علی غزل دئیوب ایلر عمل غزللرینه
ایچون کی آند ایچورم رَبُکَ اِلَی النَحله
خدا توکوبدی علینون عسل غزللرینه
- چهارشنبه
- 25
- فروردین
- 1400
- ساعت
- 15:36
- نوشته شده توسط
- یوسف اکبری
- شاعر:
-
وفا منافی اردبیلی
ارسال دیدگاه