ایستیرم ائتسه مدد حضرت زهرا بالاسی
خامه مه وئرسه توان کُلّ خلایق اقاسی
فاطمه اوغلیدی چون جمعی مریض لر شفاسی
کرمیندن آقامون من بیرین عنوان ائلیم
لطفی واردور منه،من لطفینی جبران ائلیم
بیرنفر عاشقیدی عاشق دیوانه کیمی
درد عشقیله یانوب سینه سی پروانه کیمی
کربلا هجرینه آغلاردی او مستانه کیمی
آقامون عشقینه گوزیاشی اونون دورموردی
زائر اولسون آقامون قبرینه چون اولموردی
کربلا عشقینه هر لحظه ائدوب قلبینی باز
زائر عشقیله قیلوب صبح ومسا چونکی نماز
آغلادی چوخ گئجه لر گوندوز ائدوب رازونیاز
فاطمه اوغلی آچیبدور یوزونه باب کرم
قسمت اولدی اونا آخر او ششگوشه حرم
آقامون غملری چون ائتمیشیدی قلبینی قان
اولوب آماده گئده کرب و بلایه اوزمان
دوستلاریلان تاپوب اُول خاک عراق ایچره مکان
روز اوّل دئیوبلر کی توقف ائده لر
خستگی در ائلیوب کرب و بلایه گئده لر
فاطمه اوغلونون عشقی بونا گَئتدی هیجان
رختخوابین جمع ائدوب بیر ئوزونه وئردی تکان
دئدی من بذل ائده رم کرب و بلا عشقینه جان
دوزه بیلمور ئورگیم بوگونی تا طاقت ائدم
ایستیرم پای پیاده حرمه ایندی گئدم
الغرض پای پیاده یولا دوشدی اوجوان
آغلیا آغلیا سویلوردی دیلینده آقاجان
سینون اوستونده کی اصغر بالاوا من قربان
گرک ایندی آقاجان گوزیاشیما من بورونم
ایندی بوردان حرمه سینه سی اوسته سورونم
سینه سی اوسته گلوب منزل جانانه چاتوب
گوردولر عاشقی گَرد غم واندوهه باتوب
آغلیوبدی اوقَدَر تا حرمین ایچره یاتوب
خادمین تا بیری گوردی بونی ای اهل عزا
ویردی بیر سیلی محکم اونا ائتموبدی حیا
گوزیاشی آخدی حسین عاشقینون آغلادی چوخ
دئدی بو سیلی محکم ویروب قلبیمه اُوخ
عاشقه عشق حسیندن صورا هئچ حاجت یوخ
سیلی دگدی یوزومه قلبیمه چوخ غصه اکوب
ایندی بیلدیم آقاجان نازلی رقیون نه چکوب
یاتدی خادم یوخودا درک ائلدی مولانی
دیه بیلمم یوخودا گوردی نجور آقانی
ایلدی فوری خطاب پادشه والانی
دئدی بو منظره مولا منیم قدّیم اگوب
نئدوعر علت آقاجان صاق یوزیوه سیلی دگوب
گلدی اُول لحظه دیله فاطمنون جیرانی
خادمین ائتدی خطاب کرب وبلا سلطانی
وئردی بونوعی جواب خیرنسا ریحانی
دئدی گلدیم خبرین فوری وئرم ایندی سنه
زائره سیلی ویروبسان هَمیده دگدی منه
آری آری بئله مولایه ئورکلر قربان
کُلّ شاهلار اونا نوکردی اودور چون سلطان
گئجه گوندوز اونا فخر ایلوری کُلّ ایران
بو (صبورین) یوزونه آچ آقاجان باب کرم
بونادا قسمت اولا تا کی او ششگوشه حرم
- پنج شنبه
- 26
- فروردین
- 1400
- ساعت
- 12:34
- نوشته شده توسط
- یوسف اکبری
- شاعر:
-
حیدر صبور زرنقی
ارسال دیدگاه