گل دشت کربلاده فریاده یا محمد
آتدان ییخلدی اوغلون صحراده یا محمد
الده سنان و خنجر اطرافین آلدی لشگر
یوخ بیر نفر یتیشسون امداده یا محمد
اوغلون اوقانلی چولده، عطشان یارالی یورقون
دوشدی ستمله دست جلّاده - یا محمد
جسمینده داش یاراسی اندازه‌دن کچوبدور
گلمور قلج یاراسی - تعداده یا محمد
قرآن کیمی وجودی شیرازه‌دن چخوبدور
یوخ ذرّه شرم قرخ مین اعداده یا محمد
گُل جسمینه یاغور اوخ دورت سمتیدن یاغیش تک
یوخ بیر کسی حسینون گَل داده یا محمد
اولدی پیاده آتدان اول شمر نامسلمان
ال آتدی تیغ تیز - فولاده یا محمد
باش آچدیلار ملکلر - یر گوی تزلزل ایتدی
بزم عزا قورولدی - معناده یا محمد
بیر کاسه سو بیر الده بیر الده قاره معجر
کربوبلایه گلدی - زهراده یا محمد
گوردی حسینی زهرا جان اوسته قتلگهده
صد پاره جسمی قالمیش صحراده یا محمد
قرخ مین نفر آلوبدی گُل پیکرین آرایه
بیر زینبیدی گلدی - امداده یا محمد
زینب الینده معجر، قاتل الینده خنجر
بیر کشمکش اولوب اول اثناده یا محمد
گودال کربلاده گویا قیامت اولدی
ناله سسی اوجالدی دنیاده یا محمد
نه ظلم ایدوب او کافر آگاهسن بو امره
ظلمیله قانه باتدی سجّاده یا محمد
بو شعری "اکرمی" نه حالیله باشه ویردی
سنده اونی ئولنده سال یاده یا محمد
- سه شنبه
- 31
- فروردین
- 1400
- ساعت
- 18:10
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه