گیت کناره سایه سالما سینم اوسته جبرئیل
من گرک ایفا ایدم عهد السته جبرئیل
روز ازل بیله پیمان باغلادیم جانانیله
دینه پشتیبان اولام بو چولده باش و جانیله
قتلگاه کربلاده - غسل ایدم القانیله
اولموشام ایندی او عهده پای بسته جبرئیل
واقفم خدمتدی منظورون سنون بو آن منه
قوی ولی گون یاندیرا - لشگر وورا پیکان منه
حایل اولما عرشیدن یاریم باخور الان منه
اولموشام من عشق جانان اوسته خسته جبرئیل
گیت کناره پرده سالما عاشق و معشوق آرا
باخ منی عشق حبیبیم گور چکوب گتدی هارا
خوشدلم جسمیم یارا، آلنیم یارا، باشیم یارا
باشی ویرّم ایتدیقیم عهد السته جبرئیل
ویرمیشم باش یتمسون صدمه بو شرع اقدسه
قوی بلند اولسون حرمدن ناله چرخ اطلسه
باشیمی شمر دنی مقتلده لب عطشان کسه
یاره‌لی جسمیم قالا ایستی قوم اوسته جبرئیل
دین حقّ اوسته منیم ئولدوردولر قارداشیمی
بیر به بیر ذبح ایتدیلر - مردان آل هاشمی
راضیم وورسونلار اعدالر جدایه باشیمی
باش نه لازمدور منیم تک حق‌پرسته جبرئیل
قوی فرات آخسون بلا صحراسینه دریا کیمی
قیزلاریم سولسون سوسوزلوقدان گل رعنا کیمی
ایستسم دریانی منشقّ ایلرم موسا کیمی
ایلرم بو نهری فانی چشم بسته جبرئیل
گیت کناره تا تماشا ایتسون اهل کائنات
تشنیم اما ایچم من بو سودان هیهات هات
تشنه‌ی وصل حبیبم اولماسین اصلا فرات
قوی بو سو قسمت اولا اشرار پسته جبرئیل
گیت کناره اوستومه اوخ نیزه عدوان یاغدیرا
هر طرفدن اشقیا داش یاغدیرا، قان یاغدیرا
شهپرون ویرمه قباقه تیر و پیکان یاغدیرا
مندن اوتری سن اوزوی ایتمه خسته جبرئیل
"اکرمی" سال بو غم عظمانی هر دم یاده‌سن
وار یری عمرینجه گلسن ناله و فریاده سن
شه گوز آچدی، ای ملک گلدون دیدی امداده سن
گیت کناره سایه سالما سینم اوسته جبرئیل.
- سه شنبه
- 31
- فروردین
- 1400
- ساعت
- 18:15
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه