بیر بیله کی ووروبدی بو چولده گلن سنی
قان آغلیار بو حالیده والله گورن سنی
اوخشار قزل گوله بدنون حیف ایاخلانوب
سیندیردی ای گول هانسی عدو شاخه‌دن سنی
قانلی چمنده منده قزل گول ایتورموشم
بولمم دروبدی هانسی چمندن درن سنی
چوخ اوخشوسان منیم گولومه لیک بولمورم
عطروندن اوخشادوم گولومه یاندن سنی
نه وار باشون بدنده - نه جامه - نه اللرون
هانسی نشانیله تانیسون بس گورن سنی
بو قانلی قتلگه گوزومه چوخ تانیش گلور
باخدوقجا آشنا گورورم ایندی من سنی
ایوای منه سنی تانیدوم سن حسین‌سن
اللرده ئولدوروبدی بو لشگر دونن سنی
سنسن منیم یارالی سوسوز خسته قارداشیم
حتماً ووروبدی قتلگهه هر یتن سنی
یانّام سنون بو حالیوه بیر کیمسه اولمادی
جان اوسته آرخان اوسته حسین دوندرن سنی
هانسی مصیبتونده توکوب قانیاش آغلیوم
ئولدوردی اشقیا نجه دور از وطن سنی
دفن ایتدی اوز ئولنلرینی قوم بی‌حیا
ئولسون باجین یارالی که یوخ دفن ایدن سنی
چارم اگر اولیدی سنی قبره قویماقا
گونلر ایوینده قویمازیدیم بی‌کفن سنی
آخر نقدری پستیدی بو کوفیان، مگر
پیغمبر اوغلوسان دیمدی ئولدورن سنی
هانسی حرامزاده بولوب قانیوی حلال
ووردی نه نیّتیله بو دشته گلن سنی
قربانی رسمیدور که بوله‌للر نچه یره
قسمت به قسمت ایلدی اهل فتن سنی
بیر قسمتون چاتوبدی آنام اوغلی خولیه
کول اوسته ساخلیوبدی قوناق ایلین سنی
بیر قسمتون آپاردی حسین ساربان دون
باخ ظلمه آیری سالدی ایکی عضودن سنی
قسمتده بجدله یتشوب بارماقون سنون
بیر حصّه‌ده ویروب منه قسمت ایدن سنی
صدپاره پیکرونده منیم قسمتیمده‌دی
دنیایه ویرمرم من ای عطشان ئولن سنی
گیدون لباس کهنه‌که تاراجه گیتمسون
ایستی قوم اوسته سالدیلا عریان بدن سنی
بیر بوسه‌گاه آختارورام تاپمورام ولی
هاردان گرک ئوپه آنام اوغلی ئوپن سنی
دیندیر حسین منی سنون ایستکلی باجیوام
چوخ ایسترم خدایه قسم هر ندن سنی
وار بیر سوزوم اورکده ولی آلما قلبیوه
اینجیتسه عفو ایله بو غریق محن سنی
خیمه یانان زمانده دونن گلمدون نیه
چوخ اولدی دادینه او زمان سسلین سنی
گلدی سسون قولاقیمه تکبیر باشلادون
جمع اولدی گوردی تا بالالار نیزده‌ن سنی
دوتدوم یانان چادرا سنه مجلس عزا
آلدی خبر رقیّه‌ی شیرین‌سخن سنی
دوتدوم دله دیدیم بالا یات راحت آغلاما
راحت یاتوبدی بو گیجه آرتوق سوون سنی
امّا رباب صبحه کیمی یاندی - سسلدی
گل بیرده سینمه آلوم ای صود امن سنی
سینم دولوب صودیله گیجه هاردا قالموسان
گل قوخما، یوخلیوبدی علی اوخلین سنی
قارداش دوروم گیدوم باشا گلمز بو غصّه‌لر
ئولسون باجون ملول ایلسه غصّه‌دن سنی
باشسیز قالان جنازه‌وی تاپشوردوم آلّلها
حفظ ایلسون خدای زمین و زمن سنی
ببرگون بو قتلگاه گوزل بارگاه اولار
هر سمتیدن گلر اورگی ایستین سن
زوّار دسته دسته گلر پای بوسیوه
فخر ایلر اهل عرشه زیارت ایدن سنی
ئوپدوم‌کسیک بوغازیوی فخر ایلیم‌گرک
ایتدیم زیارت ای قوری یرده دوشن سنی
بولمم بولار نه سوزدی که سن یازدون "اکرمی"
جوشه گتوردی یازدیقون اوز سرسخن سنی
عیب ایلمز نقدری وار عمرون بو درگهه
خدمت ایله یازاللار آدون آغلین سنی
بو درگهین مقامی چوخ افضلدی بول گیلن
نومید ایلمز کرم و فضلیدن سنی
امّا چالیش دوز اول که ئولندن صورا یقین
بیر فاتحیله یاد ایلسون مرد و زن سنی
- سه شنبه
- 31
- فروردین
- 1400
- ساعت
- 18:33
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه