ای باشی تندن آرالی
زینبه سس ویر یارالی
ای شه گلگون بدن - ایوای حسین ایوای
جسمی بی‌غسل و کفن - ایوای حسین ایوای
دور منه روح و روان ویر
کاروانه یول نشان ویر
زینبون یوللاندی شامه
دور اوزون قارداش اذان ویر
دستگیرم دشمنه - ایوای حسین ایوای
یوخدی باشون وای منه - ایوای حسین ایوای
نیلورم چارم آزالدی
صبریمی دشمنلر آلدی
باشیوی ووردی جدایه
پیکرون چوللرده قالدی
رحمسیزدی دشمنون - ایوای حسین ایوای
یوخ سنون پیراهنون - ایوای حسین ایوای
بو نجه حالتدی سنده
قان اولور قلبیم گورنده
باشیوه زینب دولانسون
اللرون یوخدور بدنده
ساربانه لعن اولا - ایوای حسین ایوای
جانیوه زینب فدا - ایوای حسین ایوای
اهل عشقین جانی سنسن
زینبین جانانی سنسن
دین حقّ مصطفانین
تشنه‌لب قربانی سنسن
ای ذبیحاً من قفا - ایوای حسین ایوای
کشته‌ی اهل جفا - ایوای خسین ایوای
نعشیوین یوخ سایبانی
زینبین آرتار فغانی
کیم‌گوروب اولسون شهیدین
آب غسلی لخته قانی
زینبم دل داغلارام - ایوای حسین ایوای
من سنه قان آغلارام - ایوای حسین ایوای
بادِ غم بو دشته اسدی
شمر دون ظلمه تلسدی
بو چوخور یرده حسینیم
باشیوی نه حالدا کسدی
گلدی زهرا شیونه - ایوای حسین ایوای
آغلادی خنجر سنه - ایوای حسین ایوای
قیزلارون نالاندی قارداش
حالیمه گریاندی قارداش
باشیوی قاتل کسنده
اللریم دوغراندی قارداش
قویمادی دل داغلیام - ایوای حسین ایوای
گوزلریوی باغلیام - ایوای حسین ایوای
قتلگاهه قان توکولدی
یتمیش اوچ قربان توکولدی
غارت ایتسین اهل عیالین
خیمیه عدوان توکولدی
آچدیلار ال غارته - ایوای حسین ایوای
دوشدی قیزلار وحشته - ایوای حسین ایوای
عترتین حالی پریشان
داغدیده سینه سوزان
ببر یاری یانمیش چادردا
دوتدولار شام غریبان
گه رباب ایوای دیدی - ایوای حسین ایوای
اصغره لایلای دیدی - ایوای حسین ایوای
ایتمه‌دون سن خصمه بیعت
تا قالا زنده شریعت
ایلرم تا جاندا جان وار
نهضتوندن من حمایت
قویمارام قانون باتا - ایوای حسین ایوای
دشمنون کامه چاتا - ایوای حسین ایوای
"اکرمی" یاز سینه داغلا
گوز یاشین رخساره باغلا
وار نقدری الده فرصت
گیت عزا بزمینده آغلا
سسله سوز و آهیله - ایوای حسین ایوای
لطف ایله شاها صله - ایوای حسین ایوای
- سه شنبه
- 31
- فروردین
- 1400
- ساعت
- 18:41
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه